लोणी काळभोर, ता. २२ : लोणी काळभोर व कदमवाकवस्तीचे ग्रामदैवत श्री काळभैरव अंबरनाथ देवाचा नंदी (गाव पोळ) याच्या अंगावर अज्ञात व्यक्तींनी अत्यंत ज्वलनशील असा पदार्थ टाकून त्यास जखमी केल्याची घटना घडली. या घटनेने परिसरात संताप व्यक्त केला जात असून, सोशल मीडियावर या घटनेबाबत प्रचंड टीका होत आहे. मुक्या जनावरावर असा हल्ला करणे निंदनीय असून, या घटनेने लोणी काळभोर व कदमवाकवस्ती परिसरात हळहळ व्यक्त केली जात आहे.
हे कृत्य करणाऱ्या व्यक्तीचे नाव माहीत असल्यास किंवा हल्ला केल्याचा काही पुरावा असल्यास श्री काळभैरव अंबरनाथ सर्व देवस्थान ट्रस्टचे अध्यक्ष योगेश प्रल्हाद काळभोर यांच्याशी संपर्क साधण्याचे आवाहन सोशल मीडियाद्वारे केले आहे. या घटनेची माहिती देणाऱ्या व्यक्तीचे नाव गुपित ठेवले जाणार असून, असा भ्याड हल्ला करणाऱ्या हल्लेखोराचे नाव गावातील नागरिकांच्या समोर यावे अशी विनंती याद्वारे करण्यात आली आहे.
याबाबत बोलताना लोणी काळभोर गावचे सरपंच योगेश काळभोर म्हणाले, “गावातील देवाचा नंदी (गाव पोळ) याच्यावर प्राथमिक उपचार केले आहेत. मात्र, तो अंगाला हात लावू देत नसल्याने त्याच्यावर उपचार करण्यासाठी अडचणी येत आहेत. या नंदीला (गाव पोळ) जनावरांचा सांभाळ करणाऱ्या एका संस्थेशी चर्चा करून त्यांच्या ताब्यात उपचारासाठी देण्यात येणार आहे. त्याच्यावर उपचार केल्यानंतर त्या नंदीला गावात आणण्यात येणार आहे.”
