पुणे: पुणे महापालिकेच्या आगामी निवडणुकीसाठी (Local Bodies Election) जाहीर करण्यात आलेल्या (Pune Election) प्रारुप मतदारयादीत (MVA) मोठ्या प्रमाणात चुका आढळत आहेत. अनेक मतदारांची नावे चुकीने दुसऱ्याच प्रभागात टाकण्यात आली आहेत. या त्रुटींची दुरुस्ती न करता निवडणूक घेऊ नये, अशी मागणी महाविकास आघाडीतल्या पक्षांच्या प्रतिनिधींनी केली आहे.
महापालिका आयुक्त नवल किशोर राम यांनीच अंदाजे 3 लाखांहून अधिक मतदारांची दुबार नोंदणी झाल्याची कबुली दिल्याचे विरोधक सांगतात. तसेच काही प्रभागात इतर भागातील मतदारांची नावे एकत्र आल्याने प्रशासनावर मोठी टीका होत आहे. यामुळे महापालिका प्रशासन भाजपच्या दबावाखाली काम करत असल्याचा आरोप विरोधकांकडून केला जात आहे.
मतदारयादीवरील हरकतीसाठी महापालिकेने फक्त 8 दिवसांचा कालावधी दिला आहे. चुकीची यादी तसेच ठेवून निवडणुका पुढे ढकलण्याचा प्रयत्न होत असल्याचे विरोधकांचे म्हणणे आहे. या पार्श्वभूमीवर महाविकास आघाडीच्या प्रतिनिधींच्या शिष्टमंडळाने अतिरिक्त आयुक्त ओमप्रकाश दिवटे यांची भेट घेऊन त्रुटी दूर झाल्याशिवाय निवडणूक घेऊ नये, अशी मागणी केली.
या शिष्टमंडळामध्ये राष्ट्रवादी काँग्रेस (शरद पवार), काँग्रेस, शिवसेना (ठाकरे), मनसे, वंचित बहुजन आघाडी, आम आदमी पार्टी आणि समाजवादी पक्षाचे प्रतिनिधी सहभागी झाले होते. स्थायी समितीचे माजी अध्यक्ष नीलेश निकम यांनी प्रशासनातील अधिकाऱ्यांनी प्रत्यक्ष पडताळणी न करता यादी तयार केल्याचा आरोप केला.
विशेषतः प्रभाग क्रमांक 7 (गोखलेनगर–वाकडेवाडी) च्या यादीत खडकी कॅन्टोमेंट बोर्डातील इंदिरा झोपडपट्टीच्या भाग क्रमांक 82 मधील सर्व नावे चुकून समाविष्ट झाल्याचे निकम यांनी सांगितले. महापालिकेच्या हद्दीत न राहणाऱ्या नागरिकांना महापालिकेचे मतदार बनविण्याचा प्रयत्न जाणीवपूर्वक झाल्याचा आरोपही त्यांनी केला. निकम यांनी आयुक्तांकडे प्रभाग क्रमांक 7 मधून खडकी कॅन्टोमेंट बोर्डातील 1,211 नावे वगळण्याची आणि निवडणुकीतील निष्काळजीपणा करणाऱ्या अधिकाऱ्यांवर लोक प्रतिनिधित्व अधिनियम 1951 अंतर्गत कारवाई करण्याची मागणी केली आहे.
