पुणे : “तुमच्या आमदाराने खासगी कारखाना व्यवस्थित चालवला, पण तुमच्या हक्काच्या कारखान्याची माती केली. तुम्ही म्हणाल, आता काय बोलताय, आधी मतं तुम्हीच द्यायला लावली. अरे हो की बाबा झाली चूक, मला काय माहीत हा दिवटा असा उजेड पाडेल…,” अशा शब्दांत उपमुख्यमंत्री अजित पवार यांनी आमदार अशोक पवार यांची खिल्ली उडवली.
शिरूर तालुक्यातील मांडवगण फराटा येथे शेतकरी मेळाव्यात अजित पवार बोलत होते. लोकसभा निवडणुकीच्या तोंडावर आमदार अशोक पवार यांनी उपमुख्यमंत्री अजित पवार यांची साथ सोडली. या पार्श्वभूमीवर अजित पवारांनी आज अशोक पवारांचा चांगलाच समाचार घेतला. शेतकऱ्यांची पिळवणूक होऊ नये म्हणून लवकरच घोडगंगा कारखाना संकटातून बाहेर काढणार, असे सांगत घोडगंगा कारखाना चालवायला जमत नसेल तर नवीन संचालक मंडळ आणू किंवा प्रशासकाची नेमणूक करू, पण कारखान्याला संकटातून बाहेर काढणारच… असे सांगत अजितदादांनी अशोक पवार यांना फटकारले.
अशोक पवारांवर निशाणा साधताना अजितदादा म्हणाले की, शिरूर विधानसभेचे आमदार अशोक पवारांनी घोडगंगा कारखान्यावर मुलाला चेअरमन केले. मी आमदारांना म्हटलेही तो नवखा आहे. पण आमदार कोणाचंच ऐकायला तयार नाहीत. आज काय स्थिती आहे, कारखाना बंद पडायची स्थिती निर्माण झाली आहे. आज आपल्या भागात पिकवलेला ऊस आपल्या कारखान्यात न जाता, लगतच्या भागातील कारखान्यात जातोय. त्यांचा काटा चांगला आहे.
ऊस देताना काटा नक्की चेक करा, बरेच कारखानदार काटा मारतात. आपण कष्टाने, घाम गाळून पिकवलेला ऊस आहे. त्यात आपली फसवणूक होणार नाही, यासाठी काटा तपासत चला, असा सल्ला देखील अजित पवारांनी शेतकऱ्यांना दिला. मी मुळात शेतकरीच आहे. फळबाग, भाजीपाला अशी विविध प्रकारची शेती मी करतो. वेळ मिळेल तेव्हा शेतात जातो. मात्र, कामाच्या व्यापामुळे सध्य मला शेतीकडे वेळ देता येत नाही. परंतु शेतकऱ्यांच्या समस्या मला समजलेल्या आहेत, त्या मी नक्की सोडवणार, असे अजित पवार म्हणाले.
