Illegal Hoardings Pune : शहरातील अनधिकृत होर्डिंग्सवर लगाम घालण्यासाठी महापालिकेने आता कडक मोहीम हाती घेतली आहे. आकाशचिन्ह (जाहिरात) विभागाने पाच विशेष पथके स्थापन केली असून, ही पथके शहरभर अचानक तपासणी करणार आहेत. परवानगीशिवाय उभारलेले फलक, मंजूर आकारमानापेक्षा मोठे होर्डिंग, तसेच नियमांचे उल्लंघन करणाऱ्या जाहिराती तात्काळ हटवण्यात येणार असल्याची माहिती उपायुक्त माधव जगताप यांनी दिली.
तपासणी कशी होणार?
प्रत्येक होर्डिंगच्या ठिकाणी परवानगीचा बोर्ड लावलेला आहे का, परवानगीप्रमाणेच मोजमाप आहे का, संरचनात्मक सुरक्षितता पाळली आहे का आणि जाहिरात धोरणातील इतर अटींचे पालन झाले आहे का, याची सखोल पडताळणी केली जाणार आहे. अनधिकृत फलक आढळल्यास ते तत्काळ निष्कासित केले जातील.
विशेष म्हणजे, संबंधित होर्डिंग किती वर्षांपासून उभे आहे, याचा मागोवा घेण्यासाठी गुगल इमेजचा आधार घेतला जाणार आहे. त्यानुसार थकित परवाना शुल्क, दंड आणि होर्डिंग काढण्याचा अंदाजे दोन लाख रुपयांचा खर्चही संबंधित जाहिरातदाराकडून वसूल केला जाईल.
पहिली कारवाई हडपसरमध्ये
या मोहिमेची सुरुवात हडपसर भागातून करण्यात आली. तपासणीत ३० होर्डिंग्सची पाहणी झाली असून त्यापैकी सात अनधिकृत आढळले. संबंधित फलक तातडीने हटवण्यात आले.
का महत्त्वाची आहे ही मोहीम?
अनधिकृत आणि निकृष्ट दर्जाची होर्डिंग्स वादळ, पावसाळ्यात कोसळण्याचा धोका निर्माण करतात. यामुळे वाहतुकीला अडथळा निर्माण होतो आणि नागरिकांच्या सुरक्षेलाही धोका पोहोचतो. याशिवाय शहराच्या सौंदर्यावरही परिणाम होतो आणि महसुलाचाही तोटा होतो.
महापालिकेने स्पष्ट केले आहे की ही मोहीम केवळ दिखाव्यासाठी नसून सातत्याने सुरू राहणार आहे. त्यामुळे जाहिरातदारांनी नियमांचे पालन करूनच फलक उभारावेत, अन्यथा कठोर आर्थिक कारवाईला सामोरे जावे लागेल.
