पुणे : पिंपरी-चिंचवडचे माजी शहराध्यक्ष तथा माजी महापौर संजोग वाघेरे हे अजित पवार यांचे अत्यंत विश्वासू सहकारी मानले जात होते. वाघेरे हे आता शिवसेना उद्धव ठाकरे गटाच्या दिशेने वाटचाल करत आहेत. संजोग वाघेरे यांनी सोमवारी मातोश्रीवर उद्धव ठाकरे यांची भेट घेऊन पक्ष प्रवेशाबाबत चर्चा केल्याची माहिती मिळत आहे. मला खासदार व्हायचे असल्यानेच शिवसेना उद्धव ठाकरे गटात जाण्याचा निर्णय घेतला आहे. राष्ट्रवादीतील कोणत्याही नेत्यावर मी नाराज नाही. येत्या दोन ते तीन दिवसांमध्ये याबाबत योग्य निर्णय घेणार असल्याचे संजोग वाघेरे यांनी सांगितले.
संजोग वाघेरे हे २०१४ पासून लोकसभेची तयारी करत आहेत. मात्र, पक्षाने उमेदवारीची संधी न दिल्याने शिवसेना उद्धव ठाकरे गटात जाण्याचा निर्णय घेतल्याचे वाघेरे यांनी सांगितले. याबाबत माहिती देताना वाघेरे म्हणाले की, मावळ लोकसभा मतदारसंघासाठी मी इच्छुक आहे. माझी ही भूमिका मातोश्रीवर जाऊन शिवसेना पक्ष प्रमुख उद्धव ठाकरे यांच्यासमोर मांडली. येत्या दोन ते तीन दिवसांमध्ये पक्ष प्रवेशाबाबत मी निर्णय घेणार आहे.
वाघेरे म्हणाले की, राष्ट्रवादीचा कार्यकर्ता म्हणून गेली अनेक वर्षे मी काम करत आहे. राष्ट्रवादीचे शरद पवार आणि अजित पवार यांच्यावर मी नाराज नाही. स्थानिक नेतृत्वावर देखील माझी कोणावर नाराजी नाही. मात्र, खासदार व्हायची माझी मनापासून इच्छा आहे. पिंपरी विधानसभा मतदारसंघावर आणखी पाच वर्षे मागासवर्गीय आरक्षण राहणार आहे. गेल्या २०१४ पासून मी मावळ लोकसभेची तयारी करत आहे. मावळ लोकसभा मतदारसंघ शिंदे गटाला सुटलेला आहे. म्हणून शिवसेनेची दारे ठोठावली आहेत.
