चाकण : जुन्या भांडणाच्या कारणावरून तीस जणांच्या जमावाने पाच जणांना शिवीगाळ, दमदाटी करत लाकडी काठ्या व लोखंडी पाईपने जबर मारहाण केल्याची घटना समोर आली आहे. चाकण – शिक्रापूर रस्त्यावरील शेलपिंपळगाव नजीक दौंडकरवाडी (ता. खेड) येथे सोमवारी (दि.१७) ही घटना घडली. चाकण पोलिसांनी याप्रकरणी ३० जणांवर गुन्हा दाखल केला आहे.
कृष्णा नवनाथ दौंडकर (वय २३, रा. दौंडकरवाडी, ता. खेड) यांनी याप्रकरणी चाकण पोलीस ठाण्यात फिर्याद दिली. कृष्णा यांनी चाकण पोलीस ठाण्यात दिलेल्या फिर्यादीनुसार, सत्यवान मनोहर तांबे, जीवन सातपुते, भरत शिंदे, पवन राऊत, तेजस सातपुते, बाळासाहेब देवराम दौंडकर आदींसह ३० जणांच्या विरोधात विविध कलमान्वये गुन्हा दाखल करण्यात आला आहे.
चाकण पोलिसांनी दिलेल्या माहितीनुसार, दौंडकरवाडी येथे गेल्या अनेक दिवसांपासून दोन गटात टोकाचा वाद आहे. सोमवारी सायंकाळी सात वाजताच्या दरम्यान जुन्या भांडणाच्या कारणावरून वरील आरोपींनी बेकायदा गर्दी, जमाव जमवून काठ्या आणि लोखंडी पाईपने फिर्यादी कृष्णा दौंडकर, त्यांचा चुलतभाऊ धनंजय दौंडकर, आई नर्मदा दौंडकर, चुलता सुनील दौंडकर, चुलती मंगल दौंडकर यांना शिवीगाळ, दमदाटी करत हाताने व लाथाबुक्क्यांनी जबर मारहाण केली. तसेच त्यांना जीवे ठार मारण्याच्या उद्देशाने लाकडी काठ्या व लोखंडी पाईपने त्यांच्या तोंडावर, पाठीवर व हातावर जबर मारहाण करून जखमी केले. चाकण पोलिसांनी याप्रकरणी जमावावर गुन्हा दाखल केला आहे. चाकण पोलीस ठाण्याचे वरिष्ठ पोलीस निरीक्षक प्रमोद वाघ यांच्या मार्गदर्शनाखाली अधिक तपास सुरू आहे.
