पुणे: दौंड तालुक्यातील चौफुला येथे असलेल्या अंबिका कला केंद्रावर काही दिवसांपूर्वी घडलेल्या गोळीबाराच्या प्रकाराने संपूर्ण राज्याचे लक्ष वेधून घेतले आहे. या प्रकरणात राज्याचे उपमुख्यमंत्री अजित पवार यांच्या राष्ट्रवादी काँग्रेस पक्षाचे आमदार शंकर मांडेकर यांचा भाऊ बाळासाहेब मांडेकर यांचं नाव समोर आलं असून, पोलिसांनी त्यांना व आणखी दोन जणांना ताब्यात घेतले आहे.
हे प्रकरण समोर आल्यानंतर राजकीय वर्तुळात मोठी खळबळ उडाली असून, विरोधकांनी या प्रकरणावरून सत्ता वापरून गुन्हे दडपण्याचा प्रयत्न केला जात असल्याचा आरोप केला आहे. या पार्श्वभूमीवर खुद्द आमदार शंकर मांडेकर यांनी प्रथमच माध्यमांसमोर प्रतिक्रिया दिली असून, भावाच्या चुकीच्या वर्तनावर नाराजी व्यक्त करत पोलिसांनी कठोर कारवाईच करावी अशी ठाम भूमिका मांडली आहे.
“मी कोणालाही वाचवण्यासाठी पोलिसांना फोन केलेला नाही”
भोर विधानसभा मतदारसंघाचे आमदार शंकर मांडेकर यांनी पुण्यात माध्यमांशी बोलताना स्पष्ट केलं की, “माझ्या भावाचं नाव या प्रकरणात असल्याचं मला पोलिसांच्या माध्यमातून कळलं. त्यानंतर मीच स्वतः पोलिसांना सांगितलं की योग्य ती कारवाई करा, मी कोणत्याही प्रकारचा हस्तक्षेप करणार नाही. कालपर्यंत या प्रकरणाची मला माहितीही नव्हती. पोलिसांचा फोन आल्यानंतरच हे समजलं आणि मी लगेचच माझ्या भावाला पोलीस ठाण्यात हजर होण्यास सांगितलं.”
बंदुकीचा परवाना नव्हता, तरी गोळीबार कसा झाला?
या प्रकरणात गोळीबार नेमका कोणी केला, याबाबत अद्याप तपास सुरू आहे. मांडेकर यांनी सांगितलं की, “माझ्या भावाकडे बंदुकीचा परवाना नाही. त्याच्यासोबत जे दोन-तीन लोक होते, त्यापैकी गणपत जगताप याच्याकडे बंदुकीचा परवाना आहे. नेमकं काय घडलं, हे पोलिसच तपासून सत्य बाहेर काढतील.”
भावाचं कला केंद्रावर जाणं धक्कादायक – आमदार मांडेकर
मांडेकर पुढे म्हणाले की, “माझा भाऊ साधं-सरळ आयुष्य जगतो, शेती करतो, वारकरी संप्रदायाचं काम करतो, कीर्तन करत असतो. त्यामुळे त्याचं कला केंद्रासारख्या जागी जाणं हेच माझ्यासाठी धक्कादायक होतं. आपण कसं वागायचं हे ठरवायला हवं. माझा भाऊ त्यांच्या बरोबर गेला, हे पूर्णपणे चुकीचं आहे.”
भावाच्या वागणुकीवर निराशा व्यक्त करताना मांडेकर म्हणाले, “चार भाऊ असतात, त्यात एक चोर असतो, एक देव असतो. प्रत्येक माणूस स्वतंत्र असतो आणि त्याच्या कृत्यांसाठी तोच जबाबदार असतो. कोणतीही चूक केल्यास शासन त्याला शिक्षा देईल.”
“दबाव नाही, कारवाई व्हायलाच पाहिजे”
विरोधकांकडून लावण्यात येणाऱ्या आरोपांवर उत्तर देताना मांडेकर म्हणाले की, “मी कोणत्याही प्रकारचा दबाव टाकलेला नाही. मी पोलिसांना कोणताही फोन केलेला नाही. उलट मीच सांगितलं की तो माझा भाऊ असला तरी तुम्ही कारवाई करा. मी मध्ये येणार नाही. कायद्याच्या पुढे कोणीही नाही, ही माझी स्पष्ट भूमिका आहे.”
