प्रतिनिधी -अमित मुंडीक
Crime : शहरातील बुधवार पेठ परिसरात सुरू असलेल्या देहव्यापार रॅकेटवर फरासखाना पोलीसांनी छापा टाकून मोठी कारवाई केली. या कारवाईत बांगलादेशातून नोकरीच्या आमिषाने आणलेल्या चार महिलांची सुटका करण्यात आली असून एका आरोपीला अटक करण्यात आली आहे.
फरासखाना पोलीस ठाण्यात या प्रकरणी गुन्हा क्रमांक 71/2026 नोंदवण्यात आला आहे. आरोपींविरुद्ध भारतीय दंड संहिता कलम 143(1), 143(3), 3(5) तसेच अनैतिक मानवी तस्करी प्रतिबंधक कायदा 1956 अंतर्गत कलम 3, 4, 5, 6 आणि 7 नुसार कारवाई करण्यात आली आहे. या प्रकरणी पोलीस उपनिरीक्षक चंद्रकांत गंगाधर जावळगी यांनी तक्रार दिली आहे.
आरोपी मुल्ला (बांगलादेश एजंट), बाबू भैय्या उर्फ पापा शेख, भोफसिंग राजपूत आणि मीनाक्षी रमेश मेट्री यांच्याविरुद्ध गुन्हा दाखल करण्यात आला आहे. यापैकी भोफसिंग राजपूत याला पोलीसांनी ताब्यात घेतले असून इतर आरोपींचा शोध सुरू आहे.
पोलीस उपायुक्त ऋषिकेश रावळे यांना मिळालेल्या गोपनीय माहितीनुसार, 5 मार्च रोजी सायंकाळी बुधवारी पेठेतील जनता बिल्डिंगमध्ये छापा टाकण्यात आला. वरिष्ठ पोलीस निरीक्षक प्रशांत भस्मे यांच्या मार्गदर्शनाखाली पोलिसांच्या पथकाने ही कारवाई केली.
या कारवाईत निशा उर्फ डॉली अख्तर लिटल शेख, फुलमती बेगम मोहम्मद अफजल हुसेन, शिरीना शरीफ फुल मुल्ला आणि लता उर्फ शेलिना समशुर शेख या चार बांगलादेशी महिलांची सुटका करण्यात आली. तसेच एक बांगलादेशी पुरुषही आढळून आला.
तपासात समोर आले की आरोपींनी महिलांना ब्युटी पार्लर किंवा शिवणकामाची नोकरी देण्याचे खोटे आमिष दाखवून भारतात आणले. नंतर त्यांना धमकावून आणि पैशांचे आमिष दाखवून जबरदस्तीने देहव्यापारात ढकलण्यात आले. पुढील तपास फरासखाना पोलीस करत आहेत.
