पुणे : हॉर्न वाजवून बाजूला होण्यास सांगितल्याच्या क्षुल्लक कारणावरुन वारजे येथे तरूणाला बेदम मारहाण करण्यात आल. रस्त्याच्या मधून एक जण तीघांना घेऊन हळू गाडी चालवत होता. रात्री कामावरून घरी जाताना उशीर होत असल्यामुळे त्या तरूणाने हॉर्न वाजवून तीघांना बाजूला होण्यास इशारा दिला म्हणून तिघांनी त्या तरूणाला हाताने व विटेने मारहाण केली. हा प्रकार बुधवारी (दि.21) रात्री साडेनऊ वाजण्याच्या सुमारास वारजे परिसरातील ओव्हेल नेस्ट सोसायटी जवळ घडला आहे. या मारहाणीत तरूणाची बरगडी फ्रॅक्चर झाली आहे.
याप्रकरणी वीरा निंबाळकर (वय-32 रा. ज्ञानेश्वरी उद्यानाजवळ, वारजे) यांनी वारजे माळवाडी पोलीस ठाण्यात फिर्याद दिली आहे. यावरुन दुचाकीवरील तीन अनोळखी तरुणांवर आयपीसी 326, 323, 504, 34 नुसार गुन्हा दाखल करण्यात आला.
मिळालेल्या माहितीनुसार, फिर्यादी वीरा निंबाळकर हे फातिमानगर येथे कामाला आहेत. बुधवारी रात्री ते कामावरुन घरी जात असताना आर.एम.डी. कॉलेज समोरील गार्डन सिटी चौकातून वारजेकडे वळण घेत होते. त्यावेळी त्याच्या समोर दुचाकीवरुन तीन अनोळखी तरुण जात होते. दुचाकीचालक रस्त्याच्यामधून दुचाकी चालवत असल्याने फिर्यादी यांनी हॉर्न वाजवून बाजूला होण्याचा इशारा दिला. याचा राग आल्याने आरोपींनी फिर्यादी यांच्या घराजवळ येऊन हाताने व विटेने मारहाण केली. तसेच दुचाकीवर मागे बसलेल्या इतर दोघांनी शिवीगाळ करुन मारहाण केली. यामध्ये फिर्यादी यांची बरगडी फ्रॅक्चर झाली आहे. पुढील तपास पोलीस करीत आहेत.
