विशाल शिंदे
Bhor : भोर तालुक्यातील साळवडे गावातील विठ्ठल-रुख्माई मंदिरात झालेल्या ग्रामस्तरीय बैठकीत दोन गटांमध्ये वाद होऊन धक्काबुक्कीची घटना घडली. या घटनेदरम्यान एका व्यक्तीकडील बंदूक खाली पडल्याने परिसरात एकच खळबळ उडाली असून, याप्रकरणी राजगड पोलीस स्टेशनमध्ये गुन्हा दाखल करण्यात आला आहे.
पोलिसांकडून मिळालेल्या माहितीनुसार, फिर्यादी प्रमोद धोंडीबा भडाळे (वय 28, रा. साळवडे, ता. भोर) यांनी तक्रार दिली आहे. दिनांक 19 मार्च 2026 रोजी सकाळी सुमारे 10:30 वाजण्याच्या सुमारास मंदिरात ग्रामस्तरीय बैठक सुरू असताना फिर्यादी व आरोपी निखील पांडुरंग तांबट यांच्यात पूर्वीच्या कारणावरून वाद झाला.
वाद चिघळल्याने निखील तांबट याने फिर्यादीला शिवीगाळ करत दमदाटी केली व धक्काबुक्की केली. झटापटीदरम्यान दोघे मंदिराच्या कोपऱ्यात गेले असताना निखील याच्या कमरेला असलेली सिल्वर रंगाची बंदूक खाली पडली. त्याचवेळी दुसरा आरोपी प्रथमेश संदीप तांबट याने ती बंदूक उचलून घटनास्थळावरून पळ काढल्याचे फिर्यादीत नमूद करण्यात आले आहे.
या घटनेनंतर परिसरात काही काळ तणावाचे वातावरण निर्माण झाले होते. पोलिसांनी तत्काळ घटनास्थळी धाव घेऊन परिस्थिती नियंत्रणात आणली.
याप्रकरणी निखील पांडुरंग तांबट व प्रथमेश संदीप तांबट (दोघे रा. साळवडे, ता. भोर) यांच्याविरोधात गुन्हा दाखल करण्यात आला असून पुढील तपास राजगड पोलीस स्टेशन करत आहे.
