मुंबई: नाशिकमधील अशोक खरात प्रकरणाने (Karuna Munde) आता राजकीय वर्तुळात मोठी खळबळ उडवली असून राज्य महिला आयोगाच्या अध्यक्षा रुपाली चाकणकर या वादाच्या केंद्रस्थानी आल्या आहेत. खरातसोबतचे त्यांचे फोटो आणि व्हिडीओ सोशल मीडियावर व्हायरल झाल्यानंतर या (Dhananjay Munde) प्रकरणाला वेगळेच वळण मिळाले आहे. या पार्श्वभूमीवर त्यांच्या राजीनाम्याची मागणी जोर धरू लागली आहे. (Ashok Kharat)
या वादाला अधिक हवा मिळाली ती रुपाली ठोंबरे पाटील यांच्या वक्तव्यामुळे. त्यांनी रुपाली चाकणकर या फरार झाल्याचा दावा करत थेट प्रश्न उपस्थित केले. यानंतर राजकीय आरोप-प्रत्यारोपांची मालिका सुरू झाली असून विविध स्तरांतून प्रतिक्रिया उमटू लागल्या आहेत.
दरम्यान, करुणा मुंडे यांनीही या प्रकरणात उडी घेत गंभीर आरोप केले आहेत. त्यांनी म्हटले की, रुपाली चाकणकर सध्या सार्वजनिकपणे समोर येण्याचे टाळत असून त्यांचा पर्दाफाश झाला आहे. त्यामुळे त्यांनी तातडीने राजीनामा द्यावा, अशी मागणी करुणा मुंडे यांनी केली आहे. त्या म्हणाल्या की, सोमवारपर्यंत त्या राजीनाम्याची वाट पाहणार असून त्यानंतर त्या मुंबई पोलीस आयुक्तांची भेट घेऊन मंत्रालयाबाहेर उपोषणाला बसणार आहेत.
करुणा मुंडे यांनी या प्रकरणाचा विस्तार करत आणखी धक्कादायक दावे केले. त्यांच्या मते, अशोक खरात याचे अनेक राजकीय नेत्यांशी संबंध होते आणि विविध पक्षांतील नेते त्याच्या संपर्कात होते. त्यांनी स्वतःच्या वैयक्तिक आयुष्याशी संबंधित आरोप करत धनंजय मुंडे यांचाही अप्रत्यक्ष उल्लेख केला. त्यांच्या म्हणण्यानुसार, त्यांच्या कुटुंबावरही काळी जादू करण्यात आल्याचा संशय आहे. याशिवाय ‘शर्मा’ नावाच्या एका व्यक्तीचीही चौकशी व्हावी, अशी मागणी त्यांनी केली आहे.
