सागर जगदाळे
Bhigwan : शहरात मॉडिफाईड सायलेन्सर, ट्रिपल सीट प्रवास आणि रंगीत काचा लावून वाहतूक नियमांचे उल्लंघन करणाऱ्या वाहनांचा वाढता त्रास याबाबत “पुणे प्राईम न्यूज” मध्ये बातमी प्रसिद्ध झाल्यानंतर भिगवण पोलिसांनी तात्काळ धडक मोहीम राबवत शहरात मोठ्या प्रमाणात कारवाई केली.
या विशेष तपासणी मोहिमेदरम्यान मॉडिफाईड बुलेट सायलेन्सर वापरणारी वाहने, दुचाकीवर ट्रिपल सीट प्रवास करणारे तसेच चारचाकी वाहनांना नियमबाह्य रंगीत काचा लावलेली वाहने आढळून आल्याने संबंधित वाहनचालकांवर दंडात्मक कारवाई करण्यात आली. शहरातील मुख्य चौक, बाजारपेठ आणि कॉलेज परिसरात ही मोहीम राबवण्यात आली.
या कारवाईत भिगवण पोलीस स्टेशनचे एपीआय विनोद महांगडे, पीएसआय पाटील, पीएसआय वारगड, हवालदार पवार, पोलीस अंमलदार करचे, पोलीस हवालदार लोडी, पोलीस हवालदार करचे, महिला पोलीस हवालदार भोंग तसेच होमगार्ड यांनी सहभाग घेतला.
भिगवण शहरात वाहतूक नियमांचे उल्लंघन करणाऱ्या वाहनांवर पोलिसांची कारवाई यापुढेही सातत्याने सुरू राहणार आहे. मॉडिफाईड सायलेन्सर वापरणाऱ्या वाहनांवर कडक कारवाई केली जाईल. तसेच अल्पवयीन मुलांच्या हाती दुचाकीची चावी देणाऱ्या पालकांवरही कायदेशीर कारवाई केली जाऊ शकते, असा इशारा सहाय्यक पोलीस निरीक्षक विनोद महांगडे यांनी दिला.
विनोद महांगडे (सहाय्यक पोलीस निरीक्षक, भिगवण पोलीस ठाणे)
