सागर जगदाळे, भिगवण (प्रतिनिधी)
Bhigwan : इंदापूर कृषी उत्पन्न बाजार समितीच्या उपबाजार भिगवण येथे नव्या ज्वारीला प्रति क्विंटल 6,101 रुपयांचा उच्चांकी दर मिळाल्याने शेतकऱ्यांना मोठा दिलासा मिळाला आहे. रविवारी (दि. 1 मार्च 2026) भुसार मार्केटमध्ये ज्वारी, गहू व हरभरा या शेतमालाची आवक सुरू झाली असून ज्वारीच्या दराने बाजारात सकारात्मक वातावरण निर्माण झाले आहे.
दिपक मचाले यांच्या आडतीवर आलेल्या ज्वारीची खरेदी महावीर वडुजकर यांनी 6,101 रुपयांच्या दराने केली. सध्याच्या बदलत्या बाजारस्थितीत ज्वारीला मिळालेला हा दर शेतकऱ्यांसाठी उत्साहवर्धक ठरला आहे.
भिगवण उपबाजारात शेतमालाची विक्री उघड लिलाव पद्धतीने होत असून चोख वजनमाप, पारदर्शक व्यवहार आणि विक्रीनंतर तातडीने हिशोबपट्टी व रक्कम अदा केली जाते. त्यामुळे शेतकऱ्यांचा बाजार समितीवरील विश्वास अधिक दृढ झाला आहे.
उपबाजारात 60 मेट्रिक टन क्षमतेचा वे-ब्रिज तसेच राशीन रोडलगत बाजार आवारात 100 मेट्रिक टन क्षमतेचा वे-ब्रिज 24 तास उपलब्ध आहे. या सुविधेमुळे शेतकऱ्यांना अचूक वजन व तत्काळ व्यवहाराची सोय होते.
दरम्यान, मका शेतमालाचे दर घटल्याने इंदापूर बाजार समितीने हमीभाव दराने मका खरेदी केंद्र सुरू केले आहे. या निर्णयामुळे मका उत्पादक शेतकऱ्यांना आधार मिळाला असून बाजार समितीच्या या उपक्रमाचे स्वागत होत आहे.
शेतकऱ्यांनी बाजार समितीच्या विविध योजना, हमीभाव खरेदी केंद्रे व पारदर्शक लिलाव प्रक्रियेचा लाभ घ्यावा, असे आवाहन सभापती तुषार जाधव, उपसभापती मनोहर ढुके आणि माजी सभापती आप्पासाहेब जगदाळे यांनी केले आहे.
