लोणी काळभोर : लोणी काळभोर व हडपसर पोलीस ठाण्याच्या हद्दीत खंडणी, धमकी, दरोडा व लुटमार या सारखे गुन्हे दाखल झालेल्या ऋषिकेश कामठेला लोणी काळभोर पोलिसांनी शनिवारी (ता. २७) सकाळी साडेदहा वाजण्याच्या सुमारास अटक केली आहे. पोलिसांनी आरोपीला न्यायालयात हजर केले असता, न्यायालयाने आरोपीला चार दिवसाची पोलीस कोठडी सुनावली आहे.
ऋषीकेश रामचंद्र कामठे (वय-२८, कामठे बिल्डींग, आदर्श चौक, महादेवनगर, हडपसर पुणे) असे अटक करण्यात आलेल्या आरोपीचे नाव आहे. तर याप्रकरणी ओम कृष्णा गुरुंग (वय २२, रा. ग्रिन रोड पॉवर वस्ती, कोलवडी, ता. हवेली, जि. पुणे) यांनी लोणी काळभोर पोलीस ठाण्यात फिर्याद दिली आहे.
लोणी काळभोर पोलिसांनी दिलेल्या माहितीनुसार, ओम गुरुंग हे एक हॉटेल व्यवसायिक आहेत. हॉटेल व्यवसायाच्या धंद्यातून त्यांच्या कुटुंबाचा उदरनिर्वाह चालतो. दरम्यान, ऋषीकेश कामठे व त्याचे साथीदार विनय ससाणे, कृष्णा लोया, अक्षय कांचन, प्रतिक कांचन, प्रकाश खोले व त्याच्या दोन अनोळखी मित्रांनी फिर्यादी ओम गुरुंग यांना शुक्रवारी (24 मे २०२४) भेटण्यासाठी बोलावले होते.
त्यानुसार फिर्यादी हे भेटण्यासाठी गेले. ऋषीकेश कामठे याने फिर्यादी ओम गुरुंग यांना दमदाटी केली आणि म्हणाला तू गायी, म्हशी पकडण्याच्या नावाखाली पैसे खात आहेस, अशी बातमी मिळाली आहे. तुला राहायचे आहे की नाही? असे म्हणून फिर्यादींच्या मोबाईलची तपासणी केली.
त्यानंतर आरोपी ऋषीकेश कामठे, विजय ससाणे, कृष्णा लोया यांनी फिर्यादी ओम गुरुंग व त्यांचा मित्र पार्थ यांना लोणीकाळभोर येथील भवानी माता मंदीर येथे घेवून गेले. तेथे आरोपींचे आणखी दोन अनोळखी मित्र आले. कृष्णा लोया याने फिर्यादी यांचा मित्र पार्थ सातपुते यास अलीकडेच थांबवून घेतले. तर उर्वरित आरोपींनी फिर्यादी ओम गुरुंग यांना तुझ्याशीच बोलायचे आहे, असे म्हणत त्यांना एमआयटी कॉलेजच्या पाठीमागील मोकळया जागेत घेऊन गेले. तू गायी-म्हशींची पैशांची भाड खातो, असे म्हणुन फिर्यादी यांना त्यांनी कमरेच्या पट्टयाने व लाथा बुक्क्यांनी हात, पायावर, छातीत, पाठीत, डोक्यावर मारहाण करुन जखमी केले.
दरम्यान, अर्ध्या तासानंतर आरोपी अक्षय कांचन व प्रतिक कांचन हे दोघेजण तेथे आले व फिर्यादींना म्हणाले, तूच अक्षयकडे पिस्टल असल्याची टीप पोलीसांना दिली आहेस, असे म्हणत त्या दोघांनी कमरेच्या पट्ट्याने पुन्हा फिर्यादी यांना मारहाण केली. त्यानंतर आरोपींनी ओम गुरुंग यांच्या पॅन्टच्या खिशात असलेले 5 हजार रुपये जबरदस्तीने काढून घेतले.
तसेच प्रकाश खोले याच्या मित्राने फिर्यादींच्या जवळ असलेला युबॉन कंपनीचा ब्लुटुथ हेडफोन काढून घेतला. तसेच ऋषीकेश कामठे याने जबरदस्तीने 15 हजार रुपये किंमतीचा मोबाईल जबरदस्तीने काढून घेतला. त्यानंतर आरोपींनी फिर्यादी ओम गुरुंग यांना रात्री बारा वाजेपर्यंत बसवून ठेवले. या प्रकरणी लोणी काळभोर पोलीस ठाण्यात 8 जणांवर गुन्हा दाखल करण्यात आला आहे.
सदर गुन्ह्याचा तपास करीत असताना, लोणी काळभोर पोलीस ठाण्याचे पोलिस निरीक्षक (गुन्हे) दत्तात्रय बागवे यांनी तांत्रिक विश्लेषणाच्या आधारे आरोपी ऋषीकेश कामठे याचा ठावठिकाणा शोधून काढला. त्यानंतर लोणी काळभोर पोलिसांनी आरोपी ऋषीकेश कामठेला मोठ्या शिताफीने अटक केली आहे. पोलिसांनी ऋषीकेश कामठेला न्यायालयात हजर केले असता, न्यायालयाने आरोपीला ३० जुलै पर्यंत पोलीस कोठडी सुनावली आहे.
ही कामगिरी पुणे शहर आयुक्त अमितेश कुमार, अप्पर पोलीस आयुक्त मनोज पाटील, पोलीस उपआयुक्त आर राजा, सहाय्यक पोलीस आयुक्त अश्विनी राख यांच्या मार्गदर्शनाखाली लोणी काळभोर पोलीस ठाण्याचे वरिष्ठ पोलीस निरीक्षक शशिकांत चव्हाण, पोलीस निरीक्षक (गुन्हे) दत्ताराम बागवे, पोलीस हवालदार प्रशांत कळसकर, मल्हारी ढमढेरे, व सोमनाथ गळाकाटे यांच्या पथकाने केली आहे.
अद्यापही ७ साथीदार फरार
पुणे जिल्ह्यातून तडीपार करण्यात आलेल्या गुंडांच्या टोळीने ओम गुरुंग यांना लोणी काळभोर (ता. हवेली) ग्रामपंचायत हद्दीतील राहिंज वस्ती परिसरात कंबरेच्या पट्ट्याने बेदम मारहाण करून लुटले होते. या प्रकरणी लोणी काळभोर पोलीस ठाण्यात 8 जणांवर मारहाणीसह दरोड्याचा गुन्हा दाखल करण्यात आला आहे. या गुन्ह्यातील मुख्य आरोपी ऋषीकेश कामठे याला अटक करण्यात आली आहे. मात्र या गुन्ह्यातील उर्वरील आरोपी अद्यापही फरार आहे.
