पुणे : पुण्यातील वाघोलीमधून एक धक्कादायक बातमी समोर आली आहे. घरी पार्सल देण्यासाठी गेलेल्या डिलिव्हरी तरुणाकडून घरातील १३ वर्षीय मुलीचा विनयभंग करण्यात आला आहे. ही घटना वाघोलीतील लोहगाव रोड वरील शिवरकर वस्ती मध्ये घडली आहे. या प्रकरणी त्या डिलिव्हरी करणाऱ्या तरुणावर गुन्हा दाखल करण्यात आला असून त्याला अटक केली आहे.
पोलिसांनी दिलेल्या माहितीनुसार, अविनाश धनवटे असे अटक केलेल्या तरुणाचे नाव आहे. या प्रकरणी त्या मुलीच्या आईने फिर्याद दिली आहे. डिलिव्हरी तरुण त्या मुलीच्या घरी दुपारी पार्सल देण्यासाठी गेला. त्यावेळी ती घरात एकटीच होती. त्याने तिच्या आईला फोन केला. तिने पार्सलचे १०० रुपये देण्यास मुलीस सांगितले.
१०० रुपये दिल्यानंतर त्या मुलीला त्याने पाणी आणण्यास सांगितले. तिने पाणी आणल्यानंतर त्याने तिच्या अंगावरुन हात फिरविला. यानंतर कपडे काढून तिच्यावर अत्याचार करण्याचा प्रयत्न केला. तिने आरडा ओरडा केल्यानंतर त्याने १०० रुपये देऊन तुझ्या आईला काही सांगू नको, असे म्हणून तो पळून गेला. यानंतर मुलीच्या आईने फिर्याद दिली.
