इंदापुर : रुई ता. इंदापुर येथे शुक्रवार(दि. २१) रोजी श्री छत्रपती शिवाजी महाराज यांच्या जयंतीनिमित्त भव्य मोफत नेत्र तपासणी शिबीराचे आयोजन करण्यात आले आहे. सकाळी १० ते दुपारी १ वाजेपर्यंत हे शिबीर सुरु असणार आहे. आकाश कांबळे यांच्या जनसंपर्क कार्यालयामध्ये पुण्यातील सुप्रसिद्ध एच. व्ही.देसाई नेत्र रुग्णालय (महंमदवाडी, हडपसर, पुणे) या हॉस्पिटलद्वारे मोफत नेत्र तपासणी, मोफत मोतीबिंदू शस्त्रक्रिया व गरजू व्यक्तींना अल्प दरात चष्मे वाटप शिबिर आयोजित करण्यात आले असल्याची माहिती आकाश कांबळे यांनी दिली आहे.
रुई पंचक्रोशीतील सर्व गरजू व्यक्तींनी आकाश कांबळे यांच्या जनसंपर्क कार्यालयामध्ये उपस्थित राहून या नेत्र तपासणी शिबिराचा अवश्य लाभ घ्यावा, असे आवाहन भारतीय जनता पार्टीचे पुणे जिल्हा महामंत्री आकाश कांबळे यांच्यासह आबासाहेब थोरात, तानाजी मारकड, प्रवीणकुमार शहा, दिपक साळुंखे, अविनाश मोहिते, योगेश जगताप यांच्याकडून करण्यात आले आहे.
शिबिराची खास वैशिष्ट्ये खालील प्रमाणे
1. लांबचे अथवा जवळचे कमी दिसणे यावर योग्य मार्गदर्शन व मोफत तपासणी.
2. मोफत मोतीबिंदू शस्त्रक्रिया केली जाईल.
3. मोतीबिंदू पात्र लाभार्थीना मोफत, प्रवासाची, राहण्याची तसेच जेवणाची सोय.
4. गरजू व्यक्तींना अल्प दरात चष्मे वाटप.
5. डोळ्यावर मास/पडदा आलेला असेल तर अल्प दरात शस्त्रक्रिया.
रुई पंचक्रोशीतील ज्या व्यक्तींना लांबचे अथवा जवळचे कमी दिसत आहे, सतत डोके दुखत आहे, डोळ्यांतून पाणी येत आहे, डोळ्यावर मास/पडदा वाढत चाललेला आहे. तसेच ज्या व्यक्तीकडे जुने चष्मे आहेत अशा सर्व व्यक्तींनी वेळेत उपस्थित राहून या शिबिराचा लाभ घ्यावा. सदरील शिबीरामध्ये निःशुल्क तपासणी व निःशुल्क केस पेपर राहिल, असे आवाहन देसाई हॉस्पिटलचे अजित थोरात व संयोजकांच्यावतीने करण्यात आले आहे.
