माळेगाव : बारामती तालुक्यातील माळेगाव बुद्रुक येथील नगरपंचायतीच्या ताब्यात असलेल्या बंद अंगणवाडी इमारतीमध्ये मृतदेह आढळून आल्याची घटना घडली आहे. हि घटना शनिवारी (ता. २७) सकाळच्या सुमारास उघडकीस आला आहे. या घटनेने परिसरात मोठी खळबळ उडाली आहे.
या घटनेची माहिती मिळताच मालेगाव पोलिसांनी घटनास्थळी धाव घेतली. पोलिसांनी केलेल्या प्राथमिक तपासात मृतदेह संपतराव महादेव जगताप (वय-५६ रा. अमरसिंह कॉलनी, माळेगाव) यांचा असल्याचे निष्पन्न झाले आहे.
पोलिसांनी दिलेल्या माहितीनुसार, संपतराव जगताप हे वाहन चालक आहेत. ते तीन दिवसांपासून घरी गेले नव्हते. ते चालक असल्याने बाहेरगावी गेले असावे, असा अंदाज त्यांच्या नातेवाइकांचा होता. मात्र, त्यांचा मृतदेह अमरसिंह कॉलनीमधील बंद अंगणवाडीच्या इमारतीमध्ये आढळला.
दरम्यान, त्यांचा मृत्यू कोणत्या कारणाने झाला, याचा तपास सुरु आहे. वैद्यकीय अहवालाच्या आधारे पुढील तपास करणे सोयीचे जाणार आहे. सध्या आकस्मिक मृत्यूची नोंद केली असून पुढील तपस माळेगाव पोलीस करत आहेत.
