पुणे: पुण्यात गेल्या काही दिवसापासून बलात्काराच्या घटनांमध्ये वाढ होताना दिसत आहे. 32 वर्षीय महिलेला जबरदस्तीने घरातून नेत तिच्यावर जंगलात नेऊन बलात्कार करण्याचा प्रयत्न केल्याचा धक्कादायक प्रकार समोर आला आहे. या घटनेमुळे शहरात पुन्हा मोठी खळबळ उडाली आहे. याप्रकरणी 36 वर्षीय पुरुष आरोपी आणि 32 वर्षीय महिला आरोपी यांच्या विरोधात सहकारनगर पोलिस ठाण्यात गुन्हा दाखल करण्यात आला आहे.
नेमकं काय घडलं?
याबाबत अधिक माहिती अशी कि, 32 वर्षीय महिला ही शहरातील सहकारनगर परिसरात कुटुंबासोबत राहत आहे. या महिलेला तिच्या ओळखीच्या 36 वर्षीय आरोपीने गाडीत बसवत कर्जतच्या जंगलात नेलं. त्यानंतर तिच्यावर अत्याचार करण्याचा प्रयत्न केला. एवढंच नाही तर आरोपीने पिडीत महिलेला मारहाण करत दोन दिवस घरात डांबून ठेवलं. तसेच कर्जत येथील जंगलात नेऊन तिच्यावर जबरदस्ती करत तिच्या गळ्यातील मंगळसूत्र तोडून तिच्यावर बलात्कार करण्याचा प्रयत्न केला. या घटनेने परिसरात मोठी खळबळ उडाली आहे.
दरम्यान, पुण्यातील वाडिया कॉलेजमध्ये विद्यार्थिनीवर सामूहिक बलात्कार, बोपदेव घाटात तरुणीवर सामूहिक बलात्कार, शाळकरी मुलींवर स्कूलव्हॅनमध्ये लैंगिक अत्याचार या घटना घडल्या असतानाच आता ही धक्कादायक घटना समोर आली आहे. या घटनांमुळे गुन्हेगारांना पोलिसांचा धाक राहिला नसल्याचे चित्र वारंवार दिसत आहे. असं असताना बोपदेव घाट परिसरात 21 वर्षीय तरूणीवर सामूहिक बलात्कार प्रकरणातील फरार आरोपींचा शोध घेण्यासाठी पोलिसांची वेगवेगळी पथकं काम करत आहेत.
