अमिन मुलाणी
Shirur News सविंदणे : सविंदणे (ता. शिरूर) गावातील मूळ रहिवाशी असलेले लक्ष्मण भिका नरवडे (वय ७०) हे मंगळवारपासून (ता. ३१) बेपत्ता होते. त्यांचा मृतदेह सापडल्याने मोठी खळबळ उडाली आहे. सोमवारी (ता. ६) सकाळी सविंदणे येथील भापकर वस्तीजवळील ओढ्यातील डबक्यात कुजलेल्या अवस्थेत त्यांचा मृतदेह आढळला.
वृद्ध बेपत्ता असल्याचा संदेश सोशल मीडियावर सर्वत्र व्हायरल झाला होता. भापकर वस्तीजवळील लोकांनी त्यांना वस्तीसमोरील रस्त्याने जाताना पाहिले होते. सोशल मीडियावरील मेसेज पाहिल्यानंतर त्यांनी त्यांच्या कुटुंबीयांशी संपर्क साधून, ते ज्या दिशेने गेले होते तो परिसर दाखवला. त्यावेळी ओढ्यात त्यांचा मृतदेह आढळला.
दरम्यान, बाळासाहेब डांगे यांनी घडलेल्या घटनेबाबत पोलीस ठाण्यात माहिती दिली. नरवडे यांचा पाण्यात पडून मृत्यू झाला आहे. याबाबत कोणाविरुद्ध कोणाची काही तक्रार नसल्याची माहिती त्यांनी शिरूर पोलीस स्टेशनला दिली. घटनेचा पंचनामा पोलीस उपनिरीक्षक सुनील उगले यांच्या मार्गदर्शनाखाली मांडगे यांनी केला.
