पुणे : भटक्या कुत्र्यांच्या हल्ल्यात एक पाच वर्षांचा चिमुकला गंभीर जखमी झाल्याची घटना वडगाव शेरी परिसरातल्या सनसिटीमध्ये घडली आहे. ही घटना मंगळवारी (ता. ७) सायंकाळी सहा ते साडेसहाच्या सुमारास घडली आहे.
अनिरुद्ध जोंधळे (वय.५ )असे जखमी झालेल्या चिमुकल्याचे नाव आहे.
मिळालेल्या माहिती नुसार, अनिरुद्ध खेळत असताना त्याच्यावर भटक्या कुत्र्यांनी हल्ला केला आहे. या हल्ल्यात तो गंभीर जखमी झाला आहे. त्याच्यावर खासगी रुग्णालयात उपचार सुरू आहेत. ही घटना घडल्याने नागरिकांमध्ये संतापाचे वातावरण आहे.
दरम्यान, अनिरुद्धसोबत घडलेल्या या भयंकर घटनेमुळे सन सिटी सोसायटीमधील रहिवासी रस्त्यावरती उतरले होते. नागरिकांनी थेट येरवडा पोलिस ठाणे गाठत या बाबत कठोर कारवाई करण्यात यावी, अशी मागणी देखील केली. या घटनेमुळे परिसरात काही काळ तणावाचं वातावरण निर्माण झालं होतं. मात्र, पोलिसांनी दिलेल्या आश्वासनानंतर नागरिक माघारी फिरले.
