उरुळी कांचन (पुणे) : सख्ख्या मामानेच आपल्या दोन भाचींना भर रस्त्यात विवस्त्र करून मारहाण केल्याची घटना उरुळी कांचन (ता. हवेली) ग्रामपंचायत हद्दीत गुरुवारी (ता. ०२) उघडकीस आला आहे. याप्रकरणी लोणी काळभोर पोलिसांनी सहा जणांवर गुन्हा दाखल केला आहे.
नंदकुमार माटे (मामा), सुंदरबाई नंदकुमार माटे रा. दोघेही दत्तवाडी, उरुळी कांचन, ता. हवेली), बाळासाहेब पिंगळे, आरती बाळासाहेब पिंगळे (रा. दोघेही नायगाव, ता. हवेली), सागर गोपीनाथ जगताप (रा. सहजपुर, ता. दौंड ), व रवी श्रीराम गोसावी (रा. उरुळी कांचन, ता. हवेली) अशी गुन्हा दाखल करण्यात आलेल्या आरोपींची नावे आहेत.
याप्रकरणी एका ३० वर्षीय महिलेने लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, मामाच्या मुलीबरोबर भाच्याचे प्रेमसंबंध सुरु होते. या प्रेमप्रकरणाला मामाचा तीव्र विरोध होता. पण त्या दोघांनीही पळून जाऊन लग्न केलं. त्यामुळे संतापलेल्या मामाने याचा सर्व राग मुलाच्या बहिणी म्हणजे आपल्या भाचींवर काढला. दोन बहिणींना त्याने भररस्त्यात मारहाण केली. इतक्यावरच तो थांबला नाही तर त्याने त्या मुलींना विवस्त्र करत शिवागाळही केली.
मारहाणीचा व्हिडिओ पोलिसांच्या हाती लागला आहे. हवेली तालुक्याच्या माजी उपसभापती हेमलता बडेकर यांनी हा सर्व प्रकार उघडकीस आणला आहे. पळून गेलेल्या मुलाने आपल्या बहिणींना विवस्त्र करुन झालेल्या मारहाणीचा व्हिडिओ हेमलता बडेकर यांना पाठवला. आपल्या मामाने मारहाण केल्याचा आरोप करत त्याने आपल्याला न्याय मिळवून देण्याची मागणी केली.
दरम्यान, झालेल्या प्रकाराचा गंभीर दखल घेत हेमलता बडेकर यांनी तात्काळ लोणीकाळभोर पोलीस ठाणे गाठत घडलेल्या सर्व प्रकाराची माहिती पोलिसांनी दिली. त्यानंतर याप्रकरणी त्या नराधम मामासह सहा जणांविरोधात गुन्हा दाखल करण्यात आला आहे.
