BRS In Maharashtra : पुणे : बीआरएस हा प्रामुख्याने तेलंगणा राज्यातील प्रादेशिक पक्ष आहे. मात्र, आता तो महाराष्ट्रात आपली पाळेमुळे जमवण्याससुरूवात करत आहे. आगामी विधानसभा निवडणुकीत सर्वच्या सर्व २८८ जागा लढवणार बीआरएस आहे. त्यासाठी प्रत्येक विधानसभा मतदारसंघात समन्वयक नेमण्यात आलेआहे. राज्यात २० लाख ८५ हजार पदसिद्ध पदाधिकारी यांची नोंदणी पूर्ण झाली आहे.
माणिक कदम यांचे भाकित
महाराष्ट्रात पुढच्या दोन महिन्यात आमची पक्ष सदस्य नोंदणी २ कोटीच्या पुढे जाईल, असे भाकित भारत राष्ट्र किसान समितीचे प्रदेशाध्यक्ष माणिक कदम यांनी सांगितले. तेलंगणा राज्यात बीआरएस सत्ताधारी पक्ष आहे. या पक्षाने महाराष्ट्रावर लक्ष्य केंद्रित केले आहे. महाराष्ट्रात आज या पक्षाचे राज्यातील १७ हजार गावांत पदाधिकारी आहेत.
बीआरएस भाजपची ‘बी- टीम’
‘बीआरएस’ पक्षावर भाजपची ‘बी- टीम’ असल्याचा आरोप करण्यात येत आहे. राज्यातील विरोधक हा आरोप करत आहेत. २०१९ च्या निवडणुकीत प्रकाश आंबेडकर यांची ‘वंचित बहुजन आघाडी’ जशी काँग्रेस-राष्ट्रवादी आघाडीच्या पराभवाचे कारण ठरली. त्या इतिहासाची पुनरावृत्ती के. चंद्रशेखर राव यांची ‘बीआरएस’ करते का, अशी शक्यता निर्माण झाली आहे.
विधानसभा निवडणुकीच्या तोंडावर रनणिती
विधानसभा निवडणुकीच्या तोंडावर रनणिती आखण्यात आली आहे. प्रत्येत मतदारसंघात एक समन्वयक नेमण्यात आला आहे. त्याच्याकडे टॅब देण्यात आला असून प्रचाराचे सर्व साहित्य पोच करण्यात आले आहे. राज्यात विभागनिहाय कार्यालये स्थापन करण्यात येत असून जागांचा शोध चालु आहे. आश्चर्य म्हणजे पक्ष पदाधिकारी यांच्या बँक खात्यात पक्षाने प्रत्येकी २ ते ५ लाख रुपये निधी वर्ग केला आहे. महाराष्ट्रात मूळ रोवण्यासाठी या पक्षाने प्रवेश करण्यासाठी हजारो कोटी खर्च केले आहेत.
माजी खासदार-आमदारांचा प्रवेश
पक्षात सध्या ३ माजी खासदार आणि १५ माजी आमदारांनी प्रवेश केला आहे. त्यामध्ये हरिभाऊ राठोड, धर्माण्णा सादूल, शंकर धोंडगे, भानुदास मुरकुटे, चरण वाघमारे अशा नामवंत नेत्यांचा समावेश आहे. या पक्षाच्या दलित, ओबीसी, युवा, महिला असे विविध ९ समित्या आहेत. पक्ष पोचलेल्या प्रत्येक गावात या समित्या स्थापन झाल्या आहेत.
