औरंगाबाद : राज्यातील शिंदे – फडणवीस सरकार न्यायालयाच्या निर्णयाकडे लक्ष ठेवून असून आमदाराच्या अपात्रतेच्या मुद्द्यावर न्यायालय काय निर्णय देणार यावर सरकारचे भवितव्य टिकून आहे. न्यायालयाने शिंदे गटाचे १६ आमदार अपात्र ठरवले तरी हे सरकार कोसळणार नाही, याची तजवीज उपमुख्यमंत्री देवेंद्र फडणवीस यांनी आधीच केल्याचा दावा उद्धव ठाकरे गटाचे माजी खासदार चंद्रकांत खैरे यांनी औरंगाबादमध्ये एका कार्यक्रमात केला आहे.
खैरे बोलताना म्हणाले, देवेंद्र फडणवीस हुशार आहेत. शिंदे गटाचे आमदार अपात्र ठरल्यास सरकार पडेल म्हणून त्यांनी आत्तापासूनच काँग्रेसचे २२ आमदार तयार ठेवले आहेत. यातून ते त्यांचं मुख्यमंत्रीपद मिळवून घेतील. कारण मुख्यंमत्रीपद त्यांना मिळालं नाही म्हणून त्यांचा चेहरा किती पडलेला असतो. हे सगळं असताना त्यांचे डावपेच सुरू असतात”, असं खैरे म्हणाले आहेत.
राज्यात कधीही मध्यावधी निवडणुका लागू शकतात असा अंदाज खैरे यांनी व्यक्त केला. “निवडणुका किंवा राष्ट्रपती राजवट कधीही लागू शकते. त्यामुळे काळजी घ्यायची आहे. राष्ट्रपती राजवट लागू झाली तर काय होईल? याची तुम्हाला कल्पना आहे. हे राज्यपाल कसं काम करतात. आपले १२ लोक त्यांनी घेतले नाहीत. आपलं कोणतंच काम केलं नाही”, असं खैरे पुढे म्हणाले.
खैरेंच्या व्यक्तव्याला काँग्रेसचं खोचक प्रत्युत्तर
चंद्रकांत खैरेंनी दावा केला आणि त्याला काँग्रेसचे नाना पाटोले यांनी देखील त्यावर खरमरीत प्रतिक्रिया दिली. प्रदेशाध्यक्ष असलेल्या पटोले यांनी ‘जे आपलाच पक्ष सत्तेत असून सांभाळू शकले नाहीत, तर दुसऱ्या पक्षाविषयी त्यांनी बोलायचं कारण नाही’ असे म्हणत खैरे आणि ठाकरे गटाला जोरदार प्रत्युत्तर दिले आहे.
