Viral News: राजस्थान : राजस्थानमधील नागौर जिल्ह्यात एका खासगी शाळेत 9 वर्षांच्या विद्यार्थिनीचा हृदयविकाराच्या (Heart Attack) झटक्याने मृत्यू झाल्याची दुर्दैवी घटना घडली आहे. शाळेच्या मैदानात खेळताना ती अचानक खाली कोसळली. तिला तातडीने रुग्णालयात नेण्यात आले, मात्र डॉक्टरांनी तपासणीनंतर मृत घोषित केले. या घटनेमुळे परिसरात हळहळ व्यक्त केली जात आहे.
मृत मुलीचे नाव दिव्या असून ती इयत्ता 5 वीमध्ये शिकत होती. 23 फेब्रुवारी रोजी सकाळी सुमारे 7:48 वाजता ही घटना घडली. सकाळची प्रार्थना सुरू होण्यापूर्वी अनेक विद्यार्थी मैदानात खेळत होते. दिव्या देखील त्यांच्यासोबत खेळत होती. अचानक ती डळमळली आणि काही क्षणांत बेशुद्ध होऊन जमिनीवर पडली. शाळेतील शिक्षक आणि कर्मचाऱ्यांनी तिला त्वरित जवळच्या रुग्णालयात दाखल केले. मात्र उपचार सुरू करण्यापूर्वीच तिचा मृत्यू झाल्याचे डॉक्टरांनी सांगितले.
कुटुंबाच्या संमतीने शवविच्छेदन न करता अंत्यसंस्कार करण्यात आले. या घटनेचा व्हिडिओ सोशल मीडियावर व्हायरल झाला असून अनेकांनी दु:ख व्यक्त केले आहे.
विशेष म्हणजे सुमारे 4 महिन्यांपूर्वी दिव्याच्या मोठ्या भावाचाही अशाच प्रकारे मृत्यू झाला होता. 9 सप्टेंबर 2025 रोजी तो घरी खेळताना अचानक बेशुद्ध पडला होता. त्यालाही रुग्णालयात नेण्यात आले होते, परंतु डॉक्टरांनी त्याला मृत घोषित केले होते. अल्प कालावधीत दोन मुलांचा मृत्यू झाल्याने कुटुंबीयांवर दु:खाचा डोंगर कोसळला आहे.
दरम्यान, तज्ञांच्या मते हृदयविकाराच्या आजारांमध्ये वाढ होत आहे. जागतिक आरोग्य संघटनेच्या माहितीनुसार 2022 मध्ये हृदयविकाराशी संबंधित आजारांमुळे सुमारे 19.8 दशलक्ष लोकांचा मृत्यू झाला. त्यापैकी 85 टक्के मृत्यू हृदयविकाराचा झटका आणि स्ट्रोकमुळे झाले. भारतातही या आजारांचे प्रमाण चिंताजनक असल्याचे अहवालातून स्पष्ट झाले आहे.
