उत्तरप्रदेश: उत्तरप्रदेश (Uttar Pradesh News) मधील बागपत जिल्ह्यात माणुसकीला काळीमा फासणारी एक अत्यंत हृदयद्रावक घटना घडली आहे. जुगारात पत्नीला हरल्यानंतर पतीच्या सांगण्यावरून तिच्यावर सामूहिक बलात्कार करण्यात आला. यात एकूण 8 पुरुष सहभागी होते. यात महिलेचे सासरा, तिचे दोन दीर आणि इतर नातेवाईकांचा समावेश होता. याशिवाय, बाहेरील 3 पुरुषांनीही तिच्यावर अत्याचार केले.
हुंड्यासाठी छळ करतानाच, ‘जर पैसे आणले नाहीस तर आमच्या सर्व मागण्या पूर्ण कराव्या लागतील,’ अशी धमकी सासरचे लोक तिला देत होते. ती गर्भवती असताना जबरदस्तीने गर्भपात करवून घेण्यात आला. क्रौर्याचा कळस गाठत त्यांनी तिच्यावर अॅसिड ओतले. एवढेच नाही, तर तिला नदीत ढकलून देऊन मारण्याचाही प्रयत्न करण्यात आला.
समोर आलेल्यामाहितीनुसार, पीडित महिलेचे लग्न ऑक्टोबर 24, 2024 रोजी मेरठमधील दानिश नावाच्या व्यक्तीशी झाले होते. सुरुवातीपासूनच हुंड्यासाठी तिचा छळ सुरू होता. यात पती दानिशलाही दारू आणि जुगाराचे भयंकर व्यसन होते. या व्यसनात त्याने जुगारात पत्नीलाच ‘डाव’ म्हणून लावले आणि जुगार हरल्यानंतर अनेकांनी तिच्यावर बलात्कार केला.
जीव वाचवून पीडित महिला तिच्या माहेरच्या घरी पोहोचली. तिथे पालकांनी तिला धीर दिला आणि पीडितेने थेट जिल्हा पोलीस प्रमुखांची (SP) भेट घेऊन आपल्यावर झालेल्या संपूर्ण अत्याचाराची कहाणी सांगितली. प्रकरणाचे गांभीर्य लक्षात घेऊन पोलिसांनी तात्काळ सर्व आरोपींविरुद्ध गुन्हा (FIR) दाखल केला आहे. पीडिता व तिच्या कुटुंबीयांनी आरोपींना घृणास्पद गुन्ह्यासाठी कठोर शिक्षा द्यावी अशी मागणी केली असून पोलिस या प्रकरणाचा अधिक तपास करत आहेत.
