नवी दिल्ली: राष्ट्रवादीचे नेते आणि माजी मंत्री नवाब मलिक यांना वैद्यकीय आधारावर जामीन आणखी दोन आठवड्यांनी वाढवण्यात आला आहे. नवाब मलिक यांना अंतरिम जामीन मंजूर करण्यात आल्यानंतर आज (दि. १२) त्याचा शेवटचा दिवस होता. त्यामुळे आमदार नवाब मलिक यांना पुन्हा जेल की बेल अशी चर्चा राजकीय वर्तुळात रंगली होती. मात्र, शुक्रवारी सर्वोच्च न्यायालयाकडून त्यांच्या जामीनामध्ये दोन आठवड्यांसाठी वाढ करण्यात आली आहे. या सुनावणीदरम्यान ईडीकडून ईडीच्या वाकिलांना सर्वोच्च न्यायालयामध्ये कोणती भूमिका घ्यायची, याबाबत कोणतीही सूचना न मिळाल्याने जामीन वाढवत असल्याचे सर्वोच्च न्यायालयाने आपल्या आदेशात म्हटले आहे. त्यामुळे अंतरिम मलिक यांचा जामीन दोन आठवड्यांसाठी वाढवण्यात आला.
माजी मंत्री नवाब मलिक यांना 2022 मध्ये मनी लाँड्रिंग प्रकरणात ईडीकडून अटक करण्यात आली होती. नवाब मलिक यांच्यावर अंडरवर्ल्ड दाऊद इब्राहिम आणि त्याच्या साथीदारांसोबत पैशांच्या व्यवहार केल्याचा आरोप होता. ईडी कुख्यात गँगस्टर दाऊद इब्राहिमसोबत पैशाचे व्यवहार आणि त्याच्या बहिणीसोबतच्या जमिनीच्या व्यवहाराचा तपास करत आहेत. नवाब मलिक हे अनेक दिवस तुरुंगात होते आणि काही दिवसांपूर्वी त्यांना सर्वोच्च न्यायालयाकडून वैद्यकीय आधारावर जामीन मंजूर करण्यात आला होता.
