फरिदाबाद: पत्नीने तापाने आजारी पडलेल्या (Faridabad Crime) पतीला उपचाराच्या बहाण्याने (Crime News) माहेरी बोलावलं आणि प्रियकराच्या मदतीने पतीचा खून केल्याचा धक्कादायक प्रकार समोर आला आहे. या प्रकरणात पोलिसांनी पत्नी आणि तिच्या प्रियकरावर गुन्हा दाखल करून चौकशी सुरू केली आहे. घटनास्थळी मृताच्या मानेवर गळा आवळल्याच्या खोल जखमा आढळून आल्याने पोलिसांना संशय आला आणि अखेर तपासात या भयंकर हत्येचं रहस्य उघडकीस आलं.
मिळालेल्या माहितीनुसार, मृताचे वडील सूरजपाल यांनी एनआयटी पोलिस ठाण्यात तक्रार दाखल केली आहे. ते कृष्णा नगर येथील रहिवासी असून त्यांचा मुलगा अरुण एका खाजगी रुग्णालयात सफाई कामगार म्हणून काम करत होता. काही दिवसांपासून अरुणला ताप होता आणि तब्येत बिघडली होती. गुरुवारी (6 नोव्हेंबर) अरुणची पत्नी पूनम त्याला उपचारासाठी आपल्या माहेरी, एनआयटी-5 परिसरातील घरी घेऊन गेली.
त्यानंतर पूनमने आपल्या प्रियकराला घरी बोलावले. औषध घेतल्याने अरुण झोपला होता. त्या वेळी पूनमच्या प्रियकराने अरुणचा गळा आवळून त्याची हत्या केली. ही घटना घडत असताना घरात इतर कोणीही उपस्थित नव्हते. हत्येनंतर पूनमने अरुणच्या वडिलांना फोन करून त्याचा “आजारपणामुळे मृत्यू झाला” असा खोटा दावा केला. मात्र, कुटुंबीय घटनास्थळी पोहोचल्यावर त्यांना अरुणच्या मानेवर खोल जखमा दिसल्या. त्यामुळे त्याचा खून झाल्याचा संशय अधिक बळावला.
वडील सूरजपाल यांनी तक्रारीत म्हटले आहे की, “अरुणच्या मानेवर बेल्टसारख्या वस्तूने आवळल्याच्या खुणा स्पष्ट दिसत होत्या. त्यामुळे हा आजारपणामुळे मृत्यू नसून योजनाबद्ध खून आहे.” पोलिसांनी तत्काळ पूनमला ताब्यात घेतलं आणि चौकशीत तिने गुन्ह्याची कबुली दिल्याचं समजतं.
कुटुंबीयांच्या मते, अरुण आणि पूनमचे लग्न सात वर्षांपूर्वी झाले होते, मात्र गेल्या काही वर्षांपासून त्यांच्यात सतत वाद सुरू होते. पोलिसांनी पूनम आणि तिच्या प्रियकरावर हत्येचा गुन्हा दाखल केला असून, प्रियकराची ओळख व ठिकाण लवकरच स्पष्ट होण्याची शक्यता आहे. या प्रकरणाचा पुढील तपास एनआयटी पोलिसांकडून सुरू आहे.
