अयोध्या : पंतप्रधान नरेंद्र मोदी यांचा ३० डिसेंबर रोजी रामजन्मभूमी अयोध्येत रोड शो आयोजित करण्यात आला आहे. अयोध्येतील विमानतळाचे उद्घाटन झाल्यानंतर रोड शो होणार आहे. पंतप्रधान मोदींचा १५ किलोमीटरचा रोड शो असणार आहे . त्यानंतर मोदी एका जाहीर सभेला संबोधित करणार असल्याची माहिती रविवारी जिल्हाधिकारी कार्यालयाने दिली आहे.
असा असेल मोदींचा रोड शो
राष्ट्रीय महामार्ग क्रमांक २७ वरील धर्म पथ तसेच लता मंगेशकर चौक, राम पथ, टेढी बाजार, मोहबरा चौराहा यामार्गे अयोध्या रेल्वे स्थानकापर्यंत रोड शो असणार आहे. रेल्वे स्थानकावर दाखल झाल्यानंतर मोदी वंदे भारत आणि अमृत भारत रेल्वेला हिरवा झेंडा दाखवतील. यानंतर ते रस्तामार्गे विमानतळावर परतल्यानंतर जाहीर सभेला संबोधित करणार असल्याची माहिती अयोध्येचे जिल्हाधिकारी नितीश कुमार यांनी दिली.
नरेंद्र मोदी यांच्यावर १०० हून अधिक ठिकाणी पुष्पवर्षाव
पंतप्रधान मोदी रोड शोदरम्यान प्रवास करणाऱ्या मार्गावर ५१ ठिकाणी सांस्कृतिक कार्यक्रमाचे आयोजन केले आहे. तसेच १०० हून अधिक ठिकाणी मोदींवर पुष्पवर्षाव होणार आहे. शंखनाद व स्वस्ति वाचनादरम्यान साधुसंत मंडळी पंतप्रधानांना आशीर्वाद देतील.
पंतप्रधान मोदी ३० डिसेंबरला २ तास अयोध्येत
पंतप्रधान मोदी ३० डिसेंबर रोजी २ तास अयोध्येत असणार आहेत. या दिवशी दिल्लीच्या इंदिरा गांधी आंतरराष्ट्रीय विमानतळावरून अयोध्येला येणारी पहिली फ्लाईट सकाळी १० वाजता उड्डाण करेल. दरम्यान, सकाळी ११ वाजून २० मिनिटाला ही फ्लाईट अयोध्येत दाखल होईल. यानंतर दुपारी १२ वाजता पंतप्रधान मोदी अयोध्येत दाखल होणार असल्याचे जिल्हाधिकाऱ्यांनी स्पष्ट केले आहे. पंतप्रधान मोदींच्या दौऱ्याच्या पार्श्वभूमीवर कडक सुरक्षा बंदोबस्त करण्यात येणार आहे. आल्या आहेत.
