भोपाळ: मध्य प्रदेश विधानसभा निवडणुकीची मतमोजणी सुरू झाली आहे. निवडणूक प्रचारादरम्यान पक्षांनी विजयाचे मोठमोठे दावे केले होते. कोणाचे दावे कितपत खरे ठरतात हे आज आपल्याला समजणार आहे . शनिवारी (२ डिसेंबर) निवडणूक निकाल जाहीर होण्यापूर्वी मध्य प्रदेशातील बुधनी मतदारसंघातील काँग्रेसचे उमेदवार विक्रम मस्ताल शर्मा यांनी महाकालाचे दर्शन घेत शिवराजसिंह चौहान यांचा १० हजार मतांनी पराभव करणार असल्याचा दावा केला होता. मात्र, ट्रेंडमध्ये ते शिवराजसिंह चौहान यांच्यापेक्षा मागे आहेत. जनतेने ठरवले असून यावेळी काँग्रेसच सरकार स्थापन करेल, असा दावाही विक्रम मस्ताल यांनी केला.
मध्य प्रदेशच्या जनतेने कमलनाथ यांना मुख्यमंत्री बनवण्याचा निर्णय घेतल्याचे विक्रम मस्ताल म्हणाले. आता 3 डिसेंबरला निर्णय होणार असून कमलनाथ 6 डिसेंबरला मुख्यमंत्रीपदाची शपथ घेणार आहेत. यावेळी ते शिवराज सिंह चौहान यांच्यावर जोरदार टीका करताना दिसले.
मुख्यमंत्री शिवराज सिंह चौहान यांचा पराभव करण्याचा दावाही त्यांनी केला. यावेळी धक्कादायक निकाल लागणार असून 10 हजार मतांनी विजयी होणार असल्याचे त्यांनी सांगितले. निवडणूक प्रचारादरम्यान बुधनी येथील लोकांनी शिवराज सिंह चौहान यांच्या मुलाला तेथून पळवून लावल्याचे विक्रम मस्ताल यांनी सांगितले. यावरून जनता शिवराजसिंह चौहान यांच्यावर नाराज असल्याचे दिसून येते. शिवराज यांनी स्वतःच्या भागात काम केले नाही तर इतर भागांची काय अवस्था झाली असेल.
बुधनी हा मुख्यमंत्री शिवराज सिंह चौहान यांचा पारंपरिक विधानसभा मतदारसंघ आहे. 2006 पासून ते येथून निवडणूक लढवत आहेत. यावेळी काँग्रेसने विक्रम मस्ताल शर्मा यांच्यावर विश्वास व्यक्त केला आहे. रामानंद सागर यांच्या रामायण मालिकेतही विक्रम मस्तालने हनुमानाची भूमिका साकारली आहे. गेल्या वेळी काँग्रेसने शिवराज यांच्या विरोधात माजी पीसीसी अध्यक्ष अरुण यादव यांना उमेदवारी दिली होती.
