नवी दिल्ली: धूम्रपान करणे आणि तंबाखूचे (Cigarette Price Hike) सेवन करणे खूपच महाग होणार असून केंद्र सरकारने या पदार्थांवरील करात मोठी वाढ केली आहे. संसदेत अर्थ राज्यमंत्री पंकज चौधरी यांनी मांडलेल्या नवीन प्रस्तावानुसार सिगरेट, खैनी आणि हुक्क्यासारख्या वस्तूंवर अधिक उत्पादन शुल्क आकारले जाणार आहे. वाढत्या कॅन्सरच्या आजारांना आळा बसावा आणि लोकांनी व्यसनापासून दूर राहावे या उद्देशाने हा कठोर निर्णय घेण्यात आला आहे. यामुळे भविष्यात एका सिगरेटची किंमत सध्याच्या दरापेक्षा कित्येक पटीने वाढण्याची शक्यता निर्माण झाली आहे.
कराच्या नवीन रचनेनुसार सिगरेटवरील शुल्कात मोठी तफावत पाहायला मिळणार आहे. यापूर्वी प्रति 1000 स्टिक्सवर जो कर 200 ते 735 रुपये होता, तो आता थेट 2,700 पासून 11,000 रुपयांपर्यंत नेण्यात आला आहे. यामुळे बाजारपेठेत सध्या 18 रुपयांना मिळणारी सिगरेट लवकरच 72 रुपयांपर्यंत पोहोचू शकते असा अंदाज आहे. केवळ सिगरेटच नाही तर खैनीवर आता 100 टक्के कर लागणार असून हुक्का आणि इतर स्मोकिंग मिक्सचरच्या किमतीतही मोठी वाढ होणार आहे. या निर्णयामुळे नवीन वर्षात व्यसनी लोकांच्या खिशाला मोठा आर्थिक फटका बसणार आहे.
या दरवाढीवर सोशल मीडियावर सध्या चर्चांना उधाण आले आहे. अनेक लोकांनी या निर्णयाचे समर्थन केले असून अनेकांनी विरोध केला आहे. प्रशासनाने घेतलेल्या या निर्णयामुळे तंबाखूजन्य पदार्थांच्या विक्रीवर परिणाम होऊ शकतो. वाढीव किमतींमुळे सिगरेट आणि तंबाखूची विक्री कमी होईल असा अंदाज असला तरी, यामुळे अवैध विक्री वाढू नये अशी भीतीही व्यक्त केली जात आहे.
