कोलकाता: कोलकात्यामधील आरजीकर वैद्यकीय महाविद्यालयात काही दिवसांपूर्वी एका महिला डॉक्टरवर बलात्कार केल्याची घटना घडली होती. बलात्कार करून नंतर नराधमाने तिची हत्या केली होती. या प्रकरणात आता न्यायालयाने निर्णय सुनावला आहे. या प्रकरणात न्यायालयानं आरोपी निराधम संजय रॉय याला दोषी ठरवलं आहे. संजय रॉय याच्यावरील आरोप कोर्टात सिद्ध झाले असल्याने सियालडह कोर्टाने त्याला दोषी ठरवलं आहे.
अधिक माहिती अशी की, 8 ऑगस्टच्या मध्यरात्री महिला डॉक्टरची बलात्कार करून हत्या करण्यात आली होती. याचे पडसाद संपूर्ण देशात उमटले होते. पश्चिम बंगालमध्येही जनता प्रचंड रस्त्यावर आंदोलन करत होती. कोलकातासह देशभरातील विविध वैद्यकीय महाविद्यालये तसेच रुग्णालयाती विद्यार्थी, डॉक्टरांनी काम बंद ठेऊन, मोर्चे काढून घटनेचा तीव्र निषेध व्यक्त केला होता. या घटनेनंतर मुख्यमंत्री ममता बॅनर्जी यांनी या घटनेनंतर तातडीने नवा कायदा अंमलात आणला होता.
मात्र, भाजपसह सर्व विरोधी पक्षांनी सरकारला चांगलेच धारेवर धरले होते. ममता बॅनर्जी सरकारकडून हे प्रकरण दाबण्यात आल्याचा, पुरावे नष्ट केल्याचा आरोप विरोधकांकडून होत होता. त्यामुळे हे प्रकरण नंतर कोलकाता पोलिसांकडून सीबीआयकडे सोपवण्यात आले होते.
बलात्कार आणि हत्या प्रकरणी आरोपी संजय रॉयला सियालदह न्यायालयाने शनिवारी 18 जानेवारी रोजी दोषी ठरवले. न्यायाधीश अनिर्बन दास यांनी संजय रॉयला भारतीय न्यायिक संहितेच्या कलम ६४ (बलात्काराची शिक्षा), ६६ (मृत्यूला कारणीभूत ठरण्याची शिक्षा) आणि १०३ (हत्या) नुसार दोषी ठरवल्याचा निर्णय दिला. सियालदह न्यायालयाचे अतिरिक्त जिल्हा आणि सत्र न्यायाधीश अनिर्बन दास यांनी खटला सुरू झाल्यानंतर १६१ दिवसांनी हा निकाल दिला आहे.अखेर कोर्टानं या प्रकरणात आरोपी संजय रॉय आज दोषी ठरवलं आहे. त्याला सियालडह कोर्टाने जन्मठेपेची शिक्षा सुनावली आहे.
