मुंबई : अन्न सुरक्षा आणि स्वच्छतेच्या नियमांचे उल्लंघन केल्याप्रकरणी मुंबईतील Domino’s Pizzaच्या तीन आस्थापनांवर अन्न व औषध प्रशासनाने (FDA) कारवाई केली आहे. विलेपार्ले पश्चिम, बोरिवली पश्चिम आणि घाटकोपर पश्चिम येथील संबंधित आस्थापनांचे अन्न व्यवसाय परवाने निलंबित करण्यात आले आहेत.
FDAच्या तपासणीत या तिन्ही आस्थापनांमध्ये अन्न सुरक्षा व मानके (अन्न व्यवसाय परवाना व नोंदणी) विनियम, २०११ मधील Schedule-4 मधील काही नियमांचे पालन होत नसल्याचे आढळून आले. त्यानंतर परवाने निलंबित करण्याचा निर्णय घेण्यात आला.
विलेपार्ले पश्चिमेतील एस. व्ही. रोडवरील आस्थापनाच्या तपासणीत FSSAI परवाना, पिण्याच्या पाण्याची तपासणी, अन्नपदार्थांची साठवणूक, कीटक नियंत्रण आणि स्वच्छतेशी संबंधित त्रुटी आढळल्या. Frozen Food आणि इतर अन्नपदार्थ योग्य तापमानात साठवून त्याचे नियमित तापमान परीक्षण करण्याचे निर्देश देण्यात आले आहेत. तसेच अन्न तयार करण्याच्या ठिकाणी स्वच्छता राखणे आणि अन्नपदार्थ व बिगर-अन्न वस्तूंची स्वतंत्र साठवणूक करण्यास सांगण्यात आले आहे.
किचनमधील दरवाजा, फरशी आणि Chilling Roomमध्ये आवश्यक दुरुस्ती करून उंदीर तसेच इतर कीटकांचा प्रवेश रोखण्यासाठी प्रभावी उपाययोजना करण्याचे निर्देशही देण्यात आले आहेत. कर्मचाऱ्यांसाठी हात धुण्याची आणि स्वच्छतेची योग्य सुविधा उपलब्ध करून देण्यास सांगण्यात आले आहे.
बोरिवली पश्चिमेतील आय. सी. कॉलनी परिसरातील आस्थापनाच्या तपासणीत Schedule-4 मधील नियमांचे उल्लंघन आढळले. या तपासणीत 54 टक्के Non-Compliance नोंदवण्यात आले. अन्न साठवणूक, तापमान परीक्षण, Food Testing, स्वच्छता आणि Pest Controlमध्ये सुधारणा करण्याच्या सूचना देण्यात आल्या.
कच्चे आणि शिजवलेले तसेच शाकाहारी आणि मांसाहारी अन्नपदार्थ स्वतंत्र ठेवण्याचे निर्देश देण्यात आले आहेत. उपकरणे आणि भांडी योग्य पद्धतीने स्वच्छ व निर्जंतुक करणे, तसेच Pizza आणि Food Preparation Areaमधील तेलकटपणा व अन्नाचे अवशेष नियमितपणे साफ करण्यासही सांगण्यात आले आहे.
