पुणे : पुणे टाऊन प्लॅनिंग विभागातील सहाय्यक नगर रचनाकाराकडे त्यांच्या वैध उत्पन्नापेक्षा तब्बल 2 कोटी 78 लाख 41 हजार 542 रुपयांची बेहिशेबी मालमत्ता आढळून आली आहे. या प्रकरणी लाचलुचपत प्रतिबंधक विभागाने विकास किसन ढेकळे आणि त्यांच्या पत्नी भाग्यश्री विकास ढेकळे यांच्याविरुद्ध गुन्हा दाखल केला आहे.
विकास ढेकळे हे पुणे टाऊन प्लॅनिंग विभागात वर्ग-1 अधिकारी म्हणून कार्यरत आहेत. त्यांच्या मालमत्तेबाबत 19 जून 2024 रोजी उघड चौकशी करण्याचे आदेश लाचलुचपत प्रतिबंधक विभागाच्या मुख्यालयाकडून देण्यात आले होते. त्यानुसार त्यांच्या मालमत्ता आणि उत्पन्नाची चौकशी करण्यात आली.
या चौकशीदरम्यान 17 ऑगस्ट 1999 ते 20 मार्च 2025 हा कालावधी तपासण्यात आला. त्यात ढेकळे यांनी त्यांच्या ज्ञात आणि कायदेशीर उत्पन्नापेक्षा 2 कोटी 78 लाख 41 हजार 542 रुपयांची अधिक मालमत्ता बाळगल्याचे निष्पन्न झाले. ही रक्कम त्यांच्या एकूण कायदेशीर उत्पन्नाच्या 18.47 टक्के असल्याचे लाचलुचपत प्रतिबंधक विभागाने नमूद केले आहे.
दरम्यान, उघड चौकशी सुरू असतानाच विकास ढेकळे यांच्याविरोधात लाचेची मागणी केल्याची तक्रार प्राप्त झाली होती. त्यानंतर करण्यात आलेल्या सापळा कारवाईत त्यांच्याविरुद्ध बारामती शहर पोलीस ठाण्यात 20 मार्च 2025 रोजी गुन्हा दाखल करण्यात आला होता.
उघड चौकशीदरम्यान बेहिशेबी मालमत्ता धारण करण्यास पत्नी भाग्यश्री ढेकळे यांनी अपप्रेरणा दिल्याचा आरोप आहे. तसेच चौकशीदरम्यान बनावट पावत्या सादर केल्याचेही समोर आले आहे.
या प्रकरणी हडपसर पोलीस ठाण्यात 12 ऑगस्ट 2026 रोजी भ्रष्टाचार प्रतिबंधक कायद्यासह भारतीय न्याय संहितेतील संबंधित कलमांनुसार गुन्हा दाखल करण्यात आला असून, पुढील तपास लाचलुचपत प्रतिबंधक विभागाकडून सुरू आहे.
