मुंबई : महाराष्ट्रात विशेष सखोल पुनरिक्षण (SIR) मोहिमेंतर्गत मतदार यादी अद्ययावत करण्याची प्रक्रिया सुरू असून, या प्रक्रियेचे वेळापत्रक मुख्य निवडणूक अधिकारी कार्यालयाकडून जाहीर करण्यात आले आहे. त्यानुसार १७ ऑगस्ट २०२६ पर्यंत गणना पत्र जमा करण्यात येणार आहेत. त्यानंतर २४ ऑगस्ट रोजी प्रारूप मतदार यादी प्रसिद्ध केली जाणार आहे.
प्रारूप मतदार यादी प्रसिद्ध झाल्यानंतर नागरिकांना आपल्या नावाबाबत दावे आणि हरकती दाखल करता येणार आहेत. २४ ऑगस्ट ते २३ सप्टेंबर २०२६ या कालावधीत दावे-हरकती स्वीकारले जातील. त्यानंतर प्राप्त दावे आणि हरकतींची छाननी करून त्यावर निर्णय घेण्याची प्रक्रिया सुरू राहणार आहे. ही प्रक्रिया २२ ऑक्टोबर २०२६ पर्यंत पूर्ण केली जाणार असून, २७ ऑक्टोबर रोजी अंतिम मतदार यादी प्रसिद्ध करण्यात येणार आहे.
दरम्यान, प्रारूप मतदार यादी प्रसिद्ध होत असतानाच ‘Uncollectable EF’ या संवर्गात समाविष्ट झाल्यामुळे मतदार यादीतून वगळण्यात आलेल्या नावांची स्वतंत्र यादीही २४ ऑगस्ट रोजी प्रसिद्ध केली जाणार आहे. या याद्या संबंधित शासकीय कार्यालयांमध्ये तसेच जिल्हा निवडणूक अधिकारी आणि मुख्य निवडणूक अधिकारी यांच्या संकेतस्थळांवर उपलब्ध करून दिल्या जाणार आहेत.
त्यामुळे मतदारांनी प्रारूप यादी प्रसिद्ध झाल्यानंतर आपले नाव मतदार यादीत आहे की नाही, याची खात्री करणे महत्त्वाचे ठरणार आहे. नाव वगळले असल्यास किंवा मतदार यादीतील नोंदीबाबत काही आक्षेप असल्यास निर्धारित कालावधीत दावे किंवा हरकती दाखल करता येणार आहेत.
मुख्य निवडणूक अधिकारी एस. चोक्कलिंगम यांनी ही माहिती पत्रकार परिषदेत दिली. SIR प्रक्रियेदरम्यान नागरिकांनी उपलब्ध करून दिलेल्या माहितीकडे लक्ष देऊन मतदार यादीतील आपली नोंद तपासण्याचे आवाहन करण्यात आले आहे.
