पुणे : मतदार याद्यांच्या विशेष सखोल पुनरीक्षण (SIR) कार्यक्रमांतर्गत पुणे जिल्ह्यातील अनुपस्थित, स्थलांतरित, मयत आणि दुबार मतदारांच्या (ASDD) याद्या राजकीय पक्षांना वितरित करण्यात आल्या आहेत. या याद्यांची तपासणी करून चुकीने एखाद्या मतदाराचे नाव समाविष्ट झाले असल्यास त्याबाबत प्रशासनाशी संपर्क साधावा, असे आवाहन जिल्हाधिकारी जितेंद्र डुडी यांनी केले.
जिल्हाधिकारी कार्यालयात आयोजित बैठकीत राजकीय पक्षांच्या प्रतिनिधींना या याद्या देण्यात आल्या. यावेळी उपजिल्हा निवडणूक अधिकारी मीनल कळसकर उपस्थित होत्या. जिल्हाधिकारी डुडी यांनी सांगितले की, पुणे जिल्हाधिकारी कार्यालयाच्या संकेतस्थळावरही प्रभागनिहाय ASDD याद्या प्रसिद्ध करण्यात आल्या आहेत.
या प्रक्रियेसाठी १७ ऑगस्टपर्यंतची मुदत देण्यात आली आहे. त्यामुळे राजकीय पक्षांनी आपल्या मतदान केंद्रस्तरीय प्रतिनिधींना दररोजचे उद्दिष्ट निश्चित करून याद्यांची तपासणी करून घ्यावी. तपासणीदरम्यान काही अडचण आल्यास संबंधित मतदान केंद्रस्तरीय अधिकारी अर्थात बीएलओ यांची मदत घेता येणार आहे. बीएलओंची नावे आणि संपर्क क्रमांकाची यादीही संकेतस्थळावर उपलब्ध करून देण्यात आली आहे.
एखाद्या मतदाराचे नाव चुकीने अनुपस्थित, स्थलांतरित, मयत किंवा दुबार मतदारांच्या यादीत समाविष्ट झाले असल्यास आवश्यक दुरुस्ती करून घेता येणार आहे. तसेच हरकतींवर सुनावणी झाल्यानंतर पात्र असलेली काही नावे पुन्हा मतदार यादीत समाविष्ट केली जाणार आहेत.
राजकीय पक्षांनी त्यांच्या प्रतिनिधींकडून याद्या तपासल्याचे प्रमाणपत्र घ्यावे, असेही जिल्हाधिकाऱ्यांनी सांगितले. राजकीय पक्षांच्या सहकार्यामुळे अनावश्यक हरकती कमी होतील आणि पात्र नागरिकांची नावे मतदार यादीत समाविष्ट होण्यास मदत होईल, असा विश्वास त्यांनी व्यक्त केला.
बैठकीस विविध राजकीय पक्षांचे जिल्हाध्यक्ष, शहरप्रमुख, सचिव आणि प्रतिनिधी उपस्थित होते. यावेळी संबंधित पक्षांना ASDD याद्यांच्या पेनड्राईव्हसह छापील प्रतीही देण्यात आल्या.
