मुंबई: राष्ट्रवादी काँग्रेसचे (SP) ज्येष्ठ नेते शरद पवार यांना मुंबईतील प्रसिद्ध ब्रीच कँडी रुग्णालयात दाखल करण्यात आले आहे. वाढते वय आणि राजकीय कार्यक्रमांमधील सततचा व्यस्त दिनक्रम यामुळे डॉक्टरांनी त्यांना काही आवश्यक आरोग्य चाचण्या करून घेण्याचा सल्ला दिला होता. त्यानुसार केवळ ‘रुटीन चेकअप’साठी ते रुग्णालयात गेले असून, सध्या डॉक्टरांच्या देखरेखीखाली त्यांच्या तपासण्या सुरू आहेत.
पवार साहेब रुग्णालयात गेल्याचे वृत्त वाऱ्यासारखे पसरताच सोशल मीडियावर त्यांच्या तब्येतीबाबत उलट-सुलट चर्चा सुरू झाल्या होत्या. मात्र, त्यांची प्रकृती पूर्णपणे स्थिर असून कोणतीही गंभीर समस्या उद्भवलेली नाही, असे डॉक्टरांनी स्पष्ट केले आहे. सर्व चाचण्या पूर्ण झाल्यानंतर त्यांना लगेचच डिस्चार्ज देण्यात येईल. दरम्यान, “पवार साहेबांची तब्येत ठीक असून कार्यकर्त्यांनी कोणत्याही खोट्या बातम्यांवर किंवा अफवांवर विश्वास ठेवू नये आणि काळजी करू नये,” असे अधिकृत आवाहन राष्ट्रवादी काँग्रेस पक्षाकडून करण्यात आले आहे.
यापूर्वी एप्रिल महिन्यात दिल्ली दौऱ्यावरून परतल्यानंतरही त्यांना थकवा जाणवू लागल्याने काही दिवस डॉक्टरांच्या सल्ल्याने विश्रांती घ्यावी लागली होती. तसेच काही दिवसांपूर्वी पुण्याच्या रुबी हॉल क्लिनिकमध्ये त्यांच्यावर 4 ते 5 दिवस उपचार झाले होते. तिथून घरी जाताना डॉक्टरांनी त्यांना तब्येतीची विशेष काळजी घेण्याची आणि सक्तीची विश्रांती घेण्याची सूचना केली होती. सध्या पवार साहेब डॉक्टरांच्या याच सल्ल्याचे काटेकोर पालन करत आहेत.
