नाशिक: समाजातील ढोंगी आणि भ्रष्ट प्रवृत्तींचे मुखवटे ओरबाडणारा एक धाडसी चित्रपट लवकरच प्रेक्षकांच्या भेटीला येत आहे. संपूर्ण राज्याला हादरवून सोडणाऱ्या एका खऱ्या आणि गाजलेल्या प्रकरणावर आधारित ‘महाराष्ट्र एपस्टीन फाईल्स’ या मराठी सिनेमाची अधिकृत घोषणा करण्यात आली आहे. या आगामी चित्रपटाचे मोशन पोस्टर नुकतेच सोशल मीडियावर रिलीज करण्यात आले असून, हा चित्रपट 2 October 2026 रोजी संपूर्ण महाराष्ट्रात प्रदर्शित होणार आहे.
चित्रपटाच्या पोस्टरवरून हा चित्रपट ‘कॅप्टन भोंदूबाबा’च्या काळ्या कारनाम्यांचा आणि त्याच्या गुप्त जाळ्याचा पर्दाफाश करणार असल्याचे स्पष्ट संकेत मिळतात. पोस्टरवर एक पांढरा कुर्ता, पायजमा आणि जॅकेट घातलेला सभ्य पोषाखातील व्यक्ती पाठीमागे हात करून उभा दिसतो, ज्याच्या हातात 500 रुपयांच्या नोटांचे बंडल्स आहेत. त्याच्या भोवती क्राईम सीनची पिवळी पट्टी गुंडाळलेली आहे आणि समोरील भिंतीवर ‘नाशिक’ व ‘भोंदूबाबा’ असे लिहिलेले फोटो दिसत आहेत. ‘आता सगळं उघड होणार…!’ अशी या चित्रपटाची अधिकृत टॅगलाईन आहे.
या वादग्रस्त आणि वास्तववादी विषयावर चित्रपट बनवण्याचे मोठे आव्हान दिग्दर्शक स्वरूप बी. सावंत यांनी पेलले आहे. जैन फिल्म प्रोडक्शन आणि मातोश्री एन्टरटेन्मेंट वर्ल्डच्या बॅनरखाली देवेंद्र भट, सुर्यकांत भुंडे आणि प्रशांत कदमपुरे यांनी या सिनेमाच्या निर्मितीची धुरा सांभाळली आहे. या चित्रपटाची मूळ कथा सागरकुमार एस. जैन यांनी लिहिली असून, संवाद आणि पटकथा संजय नवगिरे यांची आहे. अद्याप चित्रपटातील मुख्य कलाकारांची नावं गुप्त ठेवण्यात आली असून लवकरच याच्या चित्रीकरणाला सुरुवात होणार आहे.
