कल्याण: कल्याण पश्चिमेकडील बारावे गाव (Minor Mother) परिसरात एका दिवसाच्या स्त्री जातीच्या अर्भकाला कचऱ्याच्या ढिगाऱ्यात फेकून दिल्याची धक्कादायक घटना उघडकीस आली आहे. १७ ऑगस्टच्या सकाळी उघड झालेल्या या घटनेने शहर हादरले होते, मात्र खडकपाडा पोलिसांनी या प्रकरणाचा छडा लावला आहे.
तपासात असे निष्पन्न झाले की, एका अल्पवयीन मुलीचे तिच्याच परिचयातील एका अल्पवयीन मुलासोबत प्रेमसंबंध होते. या अनैतिक संबंधातून ती मुलगी गर्भवती राहिली. समाजात होणाऱ्या बदनामीच्या भीतीपोटी तिने ही बाब लपवून ठेवली. १६ ऑगस्ट रोजी तिने राहत्या घरीच वेदना सहन करत बाळाला जन्म दिला. प्रसूतीनंतर अतिरक्तस्राव आणि अशक्तपणामुळे ती मुलगी तब्बल सहा तास बेशुद्धावस्थेत होती.
मुलगी बेशुद्ध असताना, तिच्या अल्पवयीन प्रियकराने त्या नवजात बाळ जिवंत असूनही त्याला मृत असल्याचे मुलीला भासवले आणि बाळाला कापडात गुंडाळून बारावे गावातील शिवमंदिरासमोरील कचऱ्यात फेकून दिले. धक्कादायक बाब म्हणजे, पोटाची खळगी भरण्यासाठी ही मुलगी दुसऱ्याच दिवशी अतिशय गंभीर अवस्थेत कामावरही गेली होती.
पोलीस तिच्या कामाच्या ठिकाणी पोहोचले, तेव्हा तिची प्रकृती अत्यंत खालावलेली होती. तिला तातडीने रुग्णालयात दाखल केले, जिथे तिला १३ बाटल्या रक्त चढवावे लागले. वेळेत उपचार मिळाले नसते, तर या मुलीचा जीव जाण्याची शक्यता डॉक्टरांनी वर्तवली आहे.
