मुंबई: आयपीएल 2026 हंगामात मुंबई इंडियन्सने दमदार सुरुवात करत (MI vs KKR IPL 2026) कोलकत्ता नाईट रायडर्सवर 6 विकेट्सने शानदार विजय मिळवला. मुंबई इंडियन्स आणि कोलकाता नाईट रायडर्स यांच्यात वानखेडे मैदानावर रंगलेल्या या सामन्यात मुंबईने 221 धावांचे मोठे लक्ष्य यशस्वीरित्या गाठत चाहत्यांना रोमांचक लढत दिली. (IPL News)
कोलकत्ताने प्रथम फलंदाजी करत 221 धावांचा डोंगर उभा केला होता. एवढ्या मोठ्या लक्ष्याचा पाठलाग करताना मुंबईकडून सुरुवात अत्यंत आक्रमक झाली. Rohit Sharma आणि रायन रिकल्टन यांनी पहिल्याच षटकापासून कोलकत्ताच्या गोलंदाजांवर दबाव आणला. रोहितने केवळ 23 चेंडूत अर्धशतक पूर्ण करत आपल्या अनुभवी खेळीची झलक दाखवली, तर रिकल्टननेही 25 चेंडूत फिफ्टी झळकावली.
दोघांनी मिळून संघाला भक्कम पाया घालून दिला. रोहित शर्मा 38 चेंडूत 78 धावा करून बाद झाला. त्याच्या खेळीत 6 चौकार आणि 6 षटकारांचा समावेश होता. त्यानंतर सूर्यकुमार यादव लवकर बाद झाला, मात्र रिकल्टनने 43 चेंडूत 81 धावांची तुफानी खेळी करत मुंबईचा डाव पुढे नेला.
शेवटच्या टप्प्यात कर्णधार हार्दिक पांड्या आणि तिलक वर्मा मैदानात होते. तिलक 20 धावांवर बाद झाला, पण हार्दिकने शांतपणे खेळत आवश्यक धावा पूर्ण केल्या आणि मुंबईला विजय मिळवून दिला.
या विजयासह मुंबई इंडियन्सने एक मोठा दुष्काळ संपवला आहे. मागील 14 वर्षांपासून मुंबईला आयपीएलचा पहिला सामना जिंकता आला नव्हता. यंदा मात्र त्यांनी ही परंपरा मोडत आत्मविश्वासपूर्ण सुरुवात केली आहे. हा विजय केवळ गुणतालिकेसाठीच नाही, तर संपूर्ण संघाच्या मनोबलासाठीही महत्त्वाचा ठरणार आहे.
