कल्याण: लग्न म्हणजे दोन जिवांचे मिलन (Kalyan News) आणि विश्वासाचे नाते. पण याच विश्वासाला तडा देणारी एक धक्कादायक घटना कल्याणमध्ये उघडकीस आली आहे. एका उच्चशिक्षित महिलेची फसवणूक करून, पतीने त्याची शारीरिक व्याधी लपवून तिचा छळ केल्याप्रकरणी खडकपाडा पोलीस ठाण्यात गुन्हा दाखल करण्यात आला आहे.
मुंबईतील एका नामांकित कंपनीत वरिष्ठ अभियंता म्हणून कार्यरत असलेल्या महिलेचा विवाह मर्चंट नेव्हीत नोकरीला असलेल्या तरुणाशी मोठ्या थाटामाटात झाला होता. सुखी संसाराची स्वप्ने पाहणाऱ्या या महिलेला लग्नानंतर काही दिवसांतच पतीच्या वागण्यात बदल जाणवू लागला. पतीने शारीरिक संबंध ठेवण्यास टाळाटाळ सुरू केली, ज्यामुळे त्यांच्या वैवाहिक आयुष्यात तणाव निर्माण झाला.
सत्य आले समोर आणि पायाखालची जमीन सरकली
जेव्हा या जोडप्याने डॉक्टरांकडे धाव घेतली, तेव्हा धक्कादायक वास्तव समोर आले. पतीची लैंगिक क्षमता कमी असल्याचे वैद्यकीय अहवालात स्पष्ट झाले. इतकेच नाही तर, विवाहापूर्वीच पतीचा एक अंडकोष शस्त्रक्रिया करून काढण्यात आला होता, ही अत्यंत महत्त्वाची माहिती पती आणि सासरच्या मंडळींनी जाणीवपूर्वक लपवून ठेवल्याचा आरोप पीडित महिलेने केला आहे. दरम्यान, महिलेने तक्रार दाखल केली असून घटस्फोट घेणार असल्याचे सांगितले आहे.
