मुंबई : विरारमधून एक धक्कादायक बातमी समोर आली आहे. मित्राच्या मुलीसह तिच्या दोन मैत्रीणीवर एकाने बलात्कार केल्याची धक्कादायक घटना घडली आहे. या तिन्ही मुली अल्पवयीन असून त्यातील दोन मुली या सख्ख्या बहिणी असल्याची माहित समोर येत आहे. या प्रकरणी तक्रार दाखल करण्यात आली असून आरोपी फरार झाला आहे.
मिळालेल्या माहितीनुसार, आरोपी कमलाकर कदम (४५) हा विरार मध्ये राहतो. त्याचा मित्र तुरुंगात होता. त्या मित्राने आपल्या पत्नी आणि १७ वर्षीय मुलीचा सांभाळ करण्याची विनंती करण्यात आली होती. त्यानुसार कदम तुरुंगात असलेल्या मित्राच्या पत्नी आणि मुलीला त्याने आपल्या घरी आश्रय दिला होता. दरम्यान, मुलीची आई घर सोडून गेल्यानंतर पीडित मुलगी एकटीच राहिली. मुलगी एकटी असल्याचा फायदा घेत आरोपी कदम याने तिच्यावर बलात्कार करण्यास सुरवात केली.
मुलगी हतबल होती, तसेच आरोपी कदम याच्या धमकीमुळे ती गप्प बसली होती. दरम्यान, डिसेंबरमध्ये या पीडित मुलीच्या शेजारी एक कुटुंब राहण्यासाठी आले. त्यांच्या १३ वर्षांच्या दोन मुली होत्या. त्या मुलींची ओळख या पीडित मुलीशी होऊन घरी येजा सुरू झाली. आरोपी कदम याची या मुलींवर नजर पडली. ३१ डिसेंबरच्या रात्री आरोपीने आपल्या घरी एका मेजवानीचे (पार्टी) आयोजन केले आणि या दोन्ही मुलींनाही घरी बोलवून घेतले. त्यांना दारू पाजून आरोपी कदम याने यो दोन्ही बहिणींवर देखील बलात्कार केला. मागील दिड महिन्यापासून हा प्रकार सुरू होता, अशी माहिती विरार पोलीस ठाण्याचे वरिष्ठ पोलीस निरीक्षक लालू तुरे यांनी दिली आहे.
याप्रकरणी सोमवारी १३ वर्षाच्या मुलीकडून विरार पोलीस ठाण्यात तक्रार दाखल करण्यात आली. विरार पोलिसांनी आरोपी कमलाकर कदम याच्याविरोधात भारतीय न्याय संहितेच्या कलम ६४(२) (एम) ६५ (१) तसेच पोक्सो कायद्याच्या कलम ४, ८, १२ अन्वये गुन्हा दाखल केला आहे. आरोपी अद्याप फरार असून पोलीस त्याचा शोध घेत आहोत.
