Cyber Crime : मुंबई : सध्या स्मार्टफोन वापरणाऱ्यांची संख्या झपाट्याने वाढत आहे. त्यामुळे नव्या स्मार्टफोनची खरेदीही मोठ्या प्रमाणात होत आहे. मात्र या वाढत्या वापरासोबतच ऑनलाइन फसवणुकीचे प्रकारही वाढताना दिसत आहेत. अलीकडे स्कॅमर्सनी नवा स्मार्टफोन खरेदी करणाऱ्या ग्राहकांना लक्ष्य करण्याची नवी पद्धत वापरायला सुरुवात केली आहे.
नवा फोन खरेदी केल्यानंतर काही वेळातच ग्राहकांना कॉल येतो. कॉल करणारी व्यक्ती स्वतःला मोबाईल कंपनीचा कस्टमर केअर कर्मचारी किंवा बँकेचा अधिकारी असल्याचे सांगते. ती व्यक्ती फोन अॅक्टिव्हेशन किंवा व्हेरिफिकेशन करण्यासाठी काही प्रक्रिया पूर्ण करणे आवश्यक असल्याचे सांगते. तसे न केल्यास फोन ब्लॉक होऊ शकतो, असे सांगून ग्राहकांना घाबरवले जाते.
यानंतर संबंधित व्यक्ती फोनमध्ये काही अॅप डाउनलोड करण्यास सांगते किंवा ओटीपी, कोड यासारखी माहिती मागते. ग्राहकांनी ही माहिती दिल्यास स्कॅमरला फोनचा पूर्ण ताबा मिळू शकतो. काही प्रकरणांमध्ये फोन लॉक होऊन त्यातील महत्त्वाचा डेटा चोरीला जातो. यामध्ये बँक डिटेल्स, पासवर्ड, फोटो आणि इतर वैयक्तिक माहितीचा समावेश असतो.
अशा प्रकारच्या फसवणुकीमुळे केवळ आर्थिक नुकसानच होत नाही, तर वैयक्तिक माहितीही धोक्यात येते. अनेकदा या माहितीचा वापर करून इतर लोकांनाही फसवले जाऊ शकते.
तज्ज्ञांच्या मते, कोणताही संशयास्पद कॉल आल्यास सावध राहणे गरजेचे आहे. खऱ्या कंपन्या कधीही फोनवर ओटीपी किंवा अॅप डाउनलोड करण्यास सांगत नाहीत. घाईघाईने निर्णय घेण्यास भाग पाडणे ही स्कॅमर्सची सामान्य युक्ती असते. त्यामुळे अशा कॉल्सपासून दूर राहून योग्य खबरदारी घेणे आवश्यक आहे.
