BMC : मुंबई : मुंबई महापालिकेच्या आयुक्तपदावर अश्विनी भिडे यांची नियुक्ती करण्यात आली असून प्रशासनात मोठा बदल झाल्याचे पाहायला मिळत आहे. राज्याचे उपमुख्यमंत्री देवेंद्र फडणवीस यांच्या निर्णयानंतर ‘मेट्रो वूमन’ म्हणून ओळख असलेल्या भिडे यांच्यावर मुंबईची जबाबदारी सोपवण्यात आली आहे. त्या आज आयुक्तपदाचा पदभार स्वीकारणार आहेत.
अश्विनी भिडे या 1995 बॅचच्या आयएएस अधिकारी असून त्यांना सुमारे 25 वर्षांचा प्रशासकीय अनुभव आहे. यापूर्वी त्या मुख्यमंत्र्यांच्या अतिरिक्त मुख्य सचिव म्हणून कार्यरत होत्या. त्यांच्या कामाचा वेग, निर्णयक्षमता आणि कडक कार्यशैली यासाठी त्या ओळखल्या जातात. त्यामुळेच त्यांच्याकडून मुंबई महापालिकेच्या कामकाजात गती येण्याची अपेक्षा व्यक्त केली जात आहे.
मुंबई महापालिकेचे विद्यमान आयुक्त भूषण गगराणी आज निवृत्त होत असून त्यांच्या जागी भिडे यांची नियुक्ती करण्यात आली आहे. त्यांना आयुक्तपदाचा 3 वर्षांचा कार्यकाळ मिळणार आहे. यापूर्वी त्यांनी बीएमसीमध्ये अतिरिक्त आयुक्त म्हणून काम पाहिले असून शहरातील अनेक महत्त्वाच्या प्रकल्पांमध्ये त्यांनी भूमिका बजावली आहे.
मुंबईतील पहिल्या अंडरग्राऊंड मेट्रो 3 प्रकल्पाला मार्गी लावण्यात भिडे यांचे मोठे योगदान मानले जाते. कठीण परिस्थितीत हा प्रकल्प पुढे नेण्याचे श्रेय त्यांना दिले जाते. त्यामुळे ‘मेट्रो वूमन’ ही त्यांची ओळख अधिक मजबूत झाली आहे.
आता मुंबईसारख्या मोठ्या शहराची जबाबदारी त्यांच्या खांद्यावर आल्याने प्रशासन अधिक कार्यक्षम आणि परिणामकारक होईल, अशी अपेक्षा व्यक्त केली जात आहे. त्यांच्या कामकाजाकडे संपूर्ण राज्याचे लक्ष लागले आहे.
