नवी मुंबई: नवी मुंबईतील ऐरोली परिसरात शुक्रवारी (Accident News) सकाळी झालेल्या भीषण अपघातात दोन तरुणांचा दुर्दैवी मृत्यू झाला. सेक्टर 14 मधील न्यू होरायझन स्कूलसमोर जेसीबी मशीन आणि मोटारसायकल यांच्यात झालेल्या धडकेत हा अपघात घडला. या घटनेमुळे ऐरोली परिसरात हळहळ व्यक्त केली जात आहे. (Navi Mumbai)
पोलिसांनी दिलेल्या माहितीनुसार, 13 मार्च 2026 रोजी सकाळी सुमारे 10 वाजण्याच्या सुमारास हा अपघात झाला. जेसीबी मशीन (MH 05 BQ 250) चालक हनुमंत मारुती शिंदे हा रस्ता ओलांडत असताना समोरून येणाऱ्या बजाज अवेंजर मोटारसायकलला (MH 43 AY 0968) जोरदार धडक दिली. धडक इतकी तीव्र होती की मोटारसायकलवरील दोन्ही तरुण गंभीर जखमी झाले.
या अपघातात दिग्विजय बाबासाहेब दिंडे (वय 17, रा. सेक्टर 4, ऐरोली) आणि हर्षद सावर्डेकर (वय 18, रा. सेक्टर 8, ऐरोली) यांचा मृत्यू झाला. अपघातानंतर परिसरात मोठी गर्दी झाली होती. स्थानिकांनी तातडीने मदतीचा प्रयत्न केला, मात्र दोघांनाही गंभीर दुखापती झाल्याने त्यांचा जीव वाचू शकला नाही.
दरम्यान, अपघाताची माहिती मिळताच रबाळे पोलीस ठाण्याचे अधिकारी घटनास्थळी दाखल झाले. सहाय्यक पोलीस आयुक्त राहुल धस, वरिष्ठ पोलीस निरीक्षक बाळकृष्ण सावंत आणि पोलीस निरीक्षक शाम बनसोडे यांनी घटनास्थळी भेट देत परिस्थितीची पाहणी केली. पोलिसांनी जेसीबी चालक हनुमंत मारुती शिंदे (वय 29) याला ताब्यात घेतले असून या अपघाताबाबत पुढील चौकशी सुरू आहे.
या प्रकरणाचा तपास सहाय्यक पोलीस निरीक्षक होनमाने, पीएसआय रंजना बनसोडे आणि पीएसआय गरड करत आहेत. अपघात नेमका कसा घडला, चालकाची चूक होती का किंवा इतर काही कारण होते का याचा सविस्तर तपास सुरू आहे. दरम्यान, शहरातील गर्दीच्या रस्त्यांवर जड यंत्रसामग्रीची वाहतूक आणि वाहनचालकांची बेफिकीर ड्रायव्हिंग यामुळे अशा अपघातांची पुनरावृत्ती होत असल्याची चर्चा पुन्हा एकदा पुढे आली आहे.
