पुणे : महाराष्ट्र सरकारने राज्यातील दुष्काळग्रस्त शेतकऱ्यांसाठी एक महत्त्वाचा आणि मोठा निर्णय घेतला आहे. यंदाच्या दिवाळीत संकटात सापडलेल्या बळीराजाला दिलासा देण्यासाठी थेट त्यांच्या बँक खात्यात 5,000 रुपयांची अग्रीम मदत जमा करण्याची घोषणा करण्यात आली आहे.त्यामुळे शेतकऱ्यांना दिवाळीत याचा मोठा फायदा होणार आहे.
राज्यातील दुष्काळी स्थिती लक्षात घेता प्रथमच एवढ्या मोठ्या प्रमाणावर आर्थिक सहाय्य दिले जात असून, यामुळे सुमारे 1 ते 1.25 कोटी शेतकऱ्यांना थेट फायदा होणार आहे. या योजनेसाठी एकूण 6,000 कोटी रुपयांचा निधी मंजूर करण्यात आला असून हे वाटप वेगाने सुरू आहे.
सध्या राज्यातील तब्बल 305 तालुक्यांमध्ये पावसाअभावी तीव्र दुष्काळ निर्माण झाला आहे. पिकांचे अतोनात नुकसान झाल्याने आणि चारा-पाण्याचा प्रश्न गंभीर बनल्याने बळीराजा चिंतेत होता. शेतकऱ्यांची दिवाळी गोड व्हावी, याच उद्देशाने शासनाने हा तातडीचा दिलासा देण्याचा निर्णय घेतला आहे.
दिवाळीपूर्वी पंचनामे पूर्ण झालेल्या सर्व पात्र शेतकऱ्यांना ही मदत सरसकट वितरित केली जात आहे. आतापर्यंत 81 टक्क्यांहून अधिक पंचनाम्याचे काम पूर्ण झाले असून उर्वरित कामही वेगाने पूर्ण करण्याचे निर्देश देण्यात आले आहेत.
दुष्काळ निवारणाच्या कामात आणि बैठकांमध्ये आचारसंहितेचे कारण सांगून टाळाटाळ करणाऱ्या अधिकाऱ्यांना मुख्यमंत्र्यांनी कडक इशारा दिला आहे. दुष्काळी उपाययोजना आणि पुनरावलोकनाच्या बैठकांसाठी आचारसंहिता लागू होत नाही, तसेच यासाठी निवडणूक आयोगाच्या परवानगीची गरज नाही, असे त्यांनी स्पष्ट केले. कामचुकारपणा करणाऱ्या अधिकाऱ्यांवर थेट निलंबनाची कारवाई केली जाईल, असा स्पष्ट संदेश शासनाने दिला आहे.
यापूर्वीच्या काळात शेतकऱ्यांना मिळणारी मदत अत्यंत अल्प असायची. मात्र, सध्याच्या निर्णयामुळे थेट 5,000 रुपयांची रक्कम खात्यात जमा होणार असल्याने हा निर्णय शेतकऱ्यांसाठी अत्यंत दिलासादायक आणि उपयुक्त ठरणार आहे.
