पुणे : दिवाळीच्या सणात गावी जाणाऱ्या प्रवाशांची होणारी गर्दी आणि गैरसोय टळावी, यासाठी एसटी महामंडळ आणि रेल्वे प्रशासनाने जय्यत तयारी केली आहे. पुणे विभागातून कोकण, मराठवाडा, विदर्भ, खानदेश आणि पश्चिम महाराष्ट्रात जाणाऱ्या प्रवाशांसाठी अतिरिक्त बस आणि विशेष रेल्वे गाड्यांची घोषणा करण्यात आली आहे. यामुळे प्रवाशांचा प्रवास सुखकर होण्यास मदत होणार आहे.
पुणे विभागात 4 ते 7 नोव्हेंबर दरम्यान तब्बल 600 हून अधिक विशेष एसटी बस धावणार आहेत. प्रवाशांच्या वाढत्या गर्दीचा ताण कमी करण्यासाठी पिंपरी-चिंचवड आगारातून मराठवाडा, विदर्भ आणि खानदेशासाठी 400 हून अधिक जादा बस सोडण्यात येणार आहेत. विशेष म्हणजे, खडकीऐवजी यंदा पिंपरी-चिंचवड आगाराजवळील मोकळी जागा आणि मेट्रोची सुविधा उपलब्ध असल्यामुळे प्रवाशांना तिथे पोहोचणे अधिक सोयीचे ठरणार आहे.
दुसरीकडे, स्वारगेट आणि शिवाजीनगर स्थानकातून पश्चिम महाराष्ट्रातील सातारा, सांगली, कोल्हापूर, सोलापूर तसेच कोकणाकडे जाणाऱ्या प्रवाशांसाठी 200 हून अधिक अतिरिक्त बस चालवल्या जाणार आहेत. या सर्व विशेष बसचे ऑनलाईन आरक्षण लवकरच अधिकृत संकेतस्थळ आणि मोबाईल ॲपवर उपलब्ध होणार असल्याने प्रवाशांना रांगेत उभे राहण्याची गरज पडणार नाही.केवळ रस्ते वाहतूकच नव्हे, तर रेल्वे प्रशासनानेही ऑक्टोबर आणि नोव्हेंबर महिन्यात 9 प्रमुख मार्गांवर विशेष रेल्वेगाड्यांच्या 256फेऱ्यांचे नियोजन केले आहे. यामध्ये हडपसर ते गाझीपूर सिटी, हडपसर ते गोरखपूर, खडकी ते हजरत निजामुद्दीन, नागपूर ते हडपसर, कोल्हापूर ते कलबुर्गी आणि पुणे ते अमरावती यांसारख्या महत्त्वाच्या मार्गांचा समावेश आहे.
उत्तर भारतात आणि राज्यांतर्गत प्रवास करणाऱ्या प्रवाशांसाठी हा मोठा दिलासा आहे.एसटी आणि रेल्वेच्या या समन्वयामुळे दिवाळीच्या काळात तिकीट मिळवण्यासाठी होणारी धावपळ नक्कीच कमी होईल. प्रवाशांनी आपल्या वेळेचे नियोजन करून लवकरात लवकर आरक्षणाचा लाभ घ्यावा, असे आवाहन प्रशासनाकडून करण्यात आले आहे.
