दिल्ली : राजधानी दिल्लीत नुकत्याच घडलेल्या एका राजकीय घडामोडीमुळे वातावरण चांगलेच तापले आहे. ‘कॉकरोच जनता पार्टी’ म्हणजेच CJP चे प्रमुख नेते सौरव दास आणि आशुतोष रांका यांना न्यायालयाने 5 दिवसांची न्यायालयीन कोठडी सुनावली आहे. विशेष म्हणजे, CJP नेते अभिजीत दिपके दिल्लीत पोहोचण्याआधीच ही कारवाई झाल्याने राजकीय वर्तुळात मोठी चर्चा रंगली आहे.
मिळालेल्या माहितीनुसार, जंतरमंतरवर जमावबंदी आणि प्रवेशास सक्त बंदी असतानाही CJP च्या वतीने विनापरवानगी आंदोलन करण्यात आले होते. नियमांचे उल्लंघन केल्याप्रकरणी दिल्ली पोलिसांनी सौरव दास आणि आशुतोष रांका यांना ताब्यात घेऊन अटक केली होती. त्यानंतर आज सकाळी त्यांना न्यायालयात हजर करण्यात आले, जिथे सुनावणीनंतर त्यांना 5दिवसांची न्यायालयीन कोठडी सुनावण्यात आली.
या कारवाईनंतर CJP पक्षातर्फे तीव्र प्रतिक्रिया उमटली आहे. पक्षाचे नेते अक्षय शिंदे यांनी आक्रमक पवित्रा घेत सरकारवर ताशेरे ओढले आहेत. “सरकारने आमच्या नेत्यांना तुरुंगात डांबले तरीही आम्ही मागे हटणार नाही आणि आमचा लढा असाच सुरू राहील,” असे ते म्हणाले.
तसेच, CJP चे आणखी एक नेते अजिंक्य शिंदे यांनी केंद्र सरकारवर अधिकारांचा गैरवापर केल्याचा गंभीर आरोप केला आहे. हे नेते आपल्या स्वयंसेवकांसह जंतरमंतरच्या दिशेने निघाले होते, जिथे त्यांनी राष्ट्रध्वज फडकवून “भारत माता की जय” अशा घोषणा दिल्या, असे शिंदे यांनी स्पष्ट केले. नागरिकांचे मूलभूत हक्क दाबण्यासाठीच प्रशासनाचा गैरवापर केला जात असल्याचा दावा त्यांनी केला. पोलिसांनी नेत्यांवर बंधपत्राच्या अटी मोडल्याचा आरोप केला असला, तरी CJP नेत्यांनी तो फेटाळून लावला आहे. दुसरीकडे, आरोपी पुन्हा असाच गुन्हा करू शकतात, असा युक्तिवाद पोलिसांकडून न्यायालयात करण्यात आला आहे.
