छत्रपती संभाजीनगर : हडको परिसरातील वानखेडेनगरमधून एक अत्यंत दुर्दैवी आणि हादरवून टाकणारी घटना समोर आली आहे. अवघ्या 23 वर्षीय संजना नीलेश शेजवळ या तरुणीने राहत्या घरी गळफास घेऊन आत्महत्या केली. या घटनेमुळे संपूर्ण परिसरात हळहळ व्यक्त होत आहे.या संशयास्पद मृत्यू प्रकरणात महत्वाची माहिती समोर आली आहे.मृत संजनाच्या माहेरच्या लोकांनी पती नीलेश शेजवळ आणि त्याच्या कुटुंबीयांवर गंभीर आरोप केले आहेत.
नीलेशने लग्नापूर्वी स्वतःला सरकारी अधिकारी असल्याचे सांगून संजनाची फसवणूक केली होती. प्रत्यक्षात तो परदेशात वैद्यकीय शिक्षणासाठी मुलांना पाठवणाऱ्या एका कन्सल्टन्सी एजन्सीमध्ये कामाला होता, असे नातेवाईकांनी सांगितले आहे. खोटे बोलून लग्न केल्यामुळे संजना मानसिक तणावात होती.
मृत्यूच्या आदल्या रात्री म्हणजेच 12 ऑक्टोबर रोजी रात्री साडेदहाच्या सुमारास संजनाने तिच्या आईशी फोनवर संवाद साधला होता. घरातल्या छोट्या-छोट्या गोष्टींवरून सासरची मंडळी तिला टोमणे मारत असल्याचा संताप तिने व्यक्त केला. त्यावेळी तिच्या वडिलांनी तिला धीर दिला, काळजी करू नकोस, आम्ही सकाळी येतो असे सांगून शांत झोपायला सांगितले होते. मात्र, त्यानंतर दुसऱ्याच दिवशी सकाळी ही दुर्दैवी घटना घडली.
मंगळवारी (13 ऑक्टोबर) सकाळी संजना वरच्या मजल्यावरील खोलीत असताना, काही वेळाने तिची सासू खाली धावत आली आणि तिने पती नीलेशला या घटनेची माहिती दिली. त्यानंतर तातडीने तिला एमजीएम रुग्णालयात दाखल करण्यात आले, परंतु डॉक्टरांनी उपचारापूर्वीच तिला मृत घोषित केले.
या प्रकरणात माहेरच्या मंडळींनी संजनाच्या मृत्यूमागे घातपात असल्याचा संशय व्यक्त केला असून पती आणि सासरच्या लोकांच्या मानसिक छळाविरोधात तीव्र संताप व्यक्त केला आहे. याप्रकरणी बेगमपुरा पोलीस ठाण्यात नोंद करण्यात आली असून, पोलीस या संपूर्ण प्रकरणाची सखोल चौकशी करत आहेत. चौकशीनंतरच आत्महत्येचे नेमके कारण आणि आरोपांची सत्यता समोर येईल.
