कोल्हापूर : जिल्ह्यातील पेठवडगाव येथे चारित्र्याच्या संशयावरून पतीने पत्नीची भरदिवसा हत्या केल्याची धक्कादायक घटना समोर आली आहे. दीपक लाडू कांबळे (वय 34) असे आरोपी पतीचे नाव असून, त्याने पत्नी अमृता दीपक कांबळे (वय 29) हिचा धारदार शस्त्राने वार करून खून केला. या दुर्दैवी घटनेत दोन लहान मुलींच्या डोक्यावरील आईचे छत्र हरपले असून परिसरात तीव्र संताप व्यक्त होत आहे.
आरोपी दीपकने हा खून अत्यंत नियोजनबद्ध पद्धतीने केल्याचे समोर आले आहे. धक्कादायक बाब म्हणजे, गुन्हा करण्यापूर्वी दुपारी 2:00 वाजता त्याने आपल्या व्हॉट्सॲपवर ‘आज माझा तरी शेवट नाही तर… पुढच्याचा’ असा धमकीवजा स्टेटस ठेवला होता. यानंतर काही तासांतच त्याने या क्रूर कृत्याला अंजाम दिला.
बुधवारी दुपारी 4:15 च्या सुमारास अमृता काही कामानिमित्त पेठवडगाव येथील एस.टी. स्टँडजवळ वकिलांना भेटायला आल्या होत्या. तिथे पोहोचलेल्या दीपकने त्यांच्याशी पुन्हा वाद घालण्यास सुरुवात केली. अमृता यांनी मुलांची शपथ घेत स्वतःचा निर्दोषत्व पटवून देण्याचा प्रयत्न केला, मात्र संतापलेल्या दीपकने त्यांच्यावर धारदार शस्त्राने 6 ते 8 वार केले. गंभीर दुखापतीमुळे अमृता यांचा जागीच मृत्यू झाला.
हा वाद सुरू असताना स्थानिक लोकांनी अमृता यांना वाचवण्याचा प्रयत्न केला. परंतु, ‘हा आमचा कौटुंबिक वाद आहे, कोणीही मध्ये पडू नका’ अशी दमबाजी दीपकने उपस्थितांना केली. पत्नीचा खून केल्यानंतर त्याने हत्यार जवळच्या गटारात फेकून दिले आणि तिथून पळ काढला.
या भयंकर घटनेची माहिती मिळताच पोलिसांनी तातडीने घटनास्थळी धाव घेतली. उपविभागीय पोलीस अधिकारी अमोल ठाकूर यांनीही घटनास्थळाची पाहणी केली. पोलिसांनी आरोपी पती दीपक कांबळे याला ताब्यात घेतले असून पुढील तपास सुरू आहे. वर्ष 2016 मध्ये या दोघांचा आंतरजातीय विवाह झाला होता, मात्र संशयाच्या भूतपायी एका सुखी संसाराचा असा करुण अंत झाला.
