पुणे : पुणेकरांसाठी येणारा काळ पाण्याचा तुटवडा आणि कपातीचा असण्याची शक्यता आहे. चालू वर्षात 1 जुलैपासून आतापर्यंत पुणे शहराने 6.35 टीएमसी पाणी वापरले आहे. त्यामुळे पुढील जून 2027 अखेरपर्यंत महापालिकेच्या हातात केवळ 7.15 टीएमसी पाणी शिल्लक राहणार आहे. पाण्याचा हा उरलेला साठा विचारात घेता महापालिकेने दिवाळी सण संपल्यानंतर शहरात एक दिवस आड पाणी देण्याचे नियोजन सुरू केले आहे.
राज्यभरात अल निनोच्या प्रभावामुळे यंदा पावसाचे प्रमाण कमी राहिले. ऑगस्ट आणि सप्टेंबर महिन्यात पुरेसा पाऊस न झाल्याने धरणातील साठा मर्यादित आहे. या परिस्थितीत पिण्याच्या पाण्याला प्राधान्य देत शासनाने 20 टक्के पाणीकपातीचे निर्देश दिले आहेत. सध्या शहराला पुरवठा करणाऱ्या धरणांमध्ये सुमारे 24 टीएमसी पाणी शिल्लक आहे. या साठ्यातून बाष्पीभवन, पाणी गळती, शेती आणि इतर भागांतील पिण्याच्या पाण्याची गरज भागवावी लागणार आहे.
नुकतीच पालकमंत्री सुनेत्रा पवार यांच्या अध्यक्षतेखाली आणि जलसंपदा मंत्री राधाकृष्ण विखे पाटील व कृषी मंत्री दत्तात्रय भरणे यांच्या उपस्थितीत कालवा समितीची बैठक पार पडली. या बैठकीत सुमारे 80 लाख लोकसंख्या असलेल्या पुण्यासाठी वर्षाला 13.5 टीएमसी पाणी कोटा मंजूर करण्यात आला. मात्र हा कोटा 1 जुलैपासूनचाच ग्राह्य धरण्यात आल्याने महापालिकेची अडचण झाली आहे. महापालिकेने गेल्या तीन आठवड्यांपासून 10 टक्के पाणी बचत करण्यास सुरुवात केली होती, पण आता आणखी कडक उपाययोजना कराव्या लागणार आहेत.
बैठकीत जलसंपदा विभागाने महापालिकेच्या पाणीपुरवठा व्यवस्थेतील त्रुटी आणि थकबाकीवर बोट ठेवले. शहराची पाण्याची वाढती गरज आणि उपलब्ध साठा यांचा मेळ बसवणे आता प्रशासनासमोर मोठे आव्हान ठरत आहे
